आगामी विधानसभा आणि लोकसभा निवडणुकांमध्ये काँग्रेसच्या विजयासाठी पक्षाच्या बूथ लेव्हल एजंट्सनी अत्यंत सक्रियतेने काम करावे, असे आवाहन एआयसीसी सचिव व माजी आमदार अंजली निंबाळकर यांनी केले आहे. मतदार यादीत सर्व घटकांची नाव नोंदणी सुनिश्चित करण्यावर त्यांनी भर दिला.

कित्तूर कर्नाटक भागात मतदार नोंदणीची प्रक्रिया उत्तम प्रकारे पार पडली आहे. काँग्रेस कार्यकर्त्यांनी विशेषतः अल्पसंख्याक, मागासवर्गीय आणि एससी, एसटी बांधव असलेल्या भागांवर अधिक लक्ष केंद्रित करावे. या घटकातील एकाही नागरिकाचे नाव मतदार यादीतून सुटणार नाही याची काळजी घेत त्यांची नावे यादीत समाविष्ट करावीत, असे आवाहन अंजली निंबाळकर यांनी केले.

चिक्कोडी जिल्हा काँग्रेस कार्यालयात आयोजित लोकसभा मतदारसंघ पातळीवरील पदाधिकाऱ्यांच्या बैठकीनंतर त्या माध्यमांशी बोलत होत्या. आगामी २०२८ ची विधानसभा निवडणूक आणि २०२९ च्या लोकसभा निवडणूक लक्षात घेता काँग्रेसच्या विजयासाठी बीएलए कार्यकर्त्यांनी आतापासूनच जोमाने कामाला लागावे, अशी सूचना त्यांनी केली. या बैठकीत त्यांनी ब्लॉक अध्यक्षांशी चर्चा करून त्यांच्याकडून विविध विषयांवर मते व अहवाल जाणून घेतले.

सदर बैठक आमदार गणेश हुक्केरी आणि चिक्कोडी जिल्हा काँग्रेस अध्यक्ष लक्ष्मणराव चिंगळे यांच्या अध्यक्षतेखाली पार पडली. या महत्त्वपूर्ण बैठकीला माजी मंत्री वीरकुमार पाटील, अर्जुन नाईकवाडी यांच्यासह पक्षाचे प्रमुख नेते आणि पदाधिकारी उपस्थित होते.