उद्या अधिवेशन संपल्यानंतर मुख्यमंत्री बेळगाव सोडून बंगळुरूला रवाना होणार आहेत, त्यालाच बी.वाय. विजयेंद्र यांनी ‘आउटगोइंग’ म्हटले असावे, असा टोला मंत्री सतीश जारकीहोळी यांनी लगावला आहे.

आज सुवर्णसौध येथे माध्यमांशी बोलताना सतीश जारकीहोळी यांनी विजयेंद्र यांच्या विधानाचा समाचार घेतला. विजयेंद्र यांची ही विधाने नवीन नाहीत, ते नेहमीच असे बोलत असतात. मुख्यमंत्री सिद्धरामय्या यांनी स्वतः आपण ५ वर्षे पदावर राहणार असल्याचे स्पष्ट केले आहे, असे सतीश जारकीहोळी यांनी नमूद केले. तसेच काल आयोजित केलेल्या भोजन समारंभात कोणतीही राजकीय चर्चा झाली नाही, तर आमदार आमच्या गावी आले असल्याने केवळ भोजनाचे आयोजन केले होते, असे स्पष्टीकरण सतीश जारकीहोळी यांनी दिले.

गृहलक्ष्मी योजनेबाबत बोलताना सतीश जारकीहोळी यांनी सांगितले की, या योजनेत कोणत्याही पैशांचा गैरवापर होण्याचा प्रश्नच उद्भवत नाही. सर्व सरकारी खात्यांमध्ये अशा तांत्रिक प्रक्रिया होत असतात. गेल्या दोन वर्षांपासून आम्ही महिलांना पैसे देत आहोत. अर्थ विभागाकडून अनुदान मिळताच प्रलंबित रक्कम त्वरित जमा केली जाईल, असे सतीश जारकीहोळी यांनी स्पष्ट केले.

भाजप नेते केवळ संभ्रम निर्माण करण्याचा प्रयत्न करत असल्याची टीका त्यांनी केली. सरकारचे कामकाज सुरळीत सुरू असून कोणत्याही गॅरंटी योजना थांबणार नाहीत, अशी ग्वाही सतीश जारकीहोळी यांनी दिली. विरोधकांनी विकासकामांवर चर्चा करावी, असे आवाहनही सतीश जारकीहोळी यांनी यावेळी केले.