राज्य सरकारच्या महत्त्वाकांक्षी ‘शक्ती’ योजनेसाठी निधीची कमतरता असल्याचा भाजप नेत्यांचा दावा परिवहन मंत्री रामलिंगा रेड्डी यांनी फेटाळून लावला आहे. शक्ती योजनेसाठी पुरेसा निधी उपलब्ध असून भाजपचे सर्व आरोप केवळ राजकारणाने प्रेरित असल्याचे त्यांनी स्पष्ट केले.

बेळगाव येथे प्रसारमाध्यमांशी संवाद साधताना रामलिंगा रेड्डी यांनी भाजपच्या कार्यकाळातील त्रुटींवर कडाडून टीका केली. भाजप सत्ता सोडून जाताना परिवहन महामंडळांना सुमारे ४,००० कोटी रुपयांच्या कर्जाच्या खाईत लोटले होते आणि कामगारांच्या न्याय्य मागण्या प्रलंबित ठेवल्या होत्या, असा आरोप त्यांनी केला. भाजपच्या काळात एकही नवीन भरती झाली नव्हती, मात्र आमचे सरकार सत्तेवर आल्यापासून ५,८०० नवीन बसेस ताफ्यात दाखल झाल्या असून भाजपच्या काळातील कर्ज आता आम्ही फेडत आहोत, असे त्यांनी म्हटले.

केंद्र सरकारच्या दुजाभावाच्या धोरणाचा निषेध करत मंत्र्यांनी राज्याला मिळणारा कराचा वाटा आणि अनुदानाबाबत प्रश्न उपस्थित केले. पाचव्या वित्त आयोगाच्या शिफारशीनुसार भद्रा अप्पर बँक प्रकल्पासाठी घोषित केलेले ५,३०० कोटी रुपये आणि इतर विशेष अनुदान अद्याप केंद्राने दिलेले नाही, अशी तक्रार रामलिंगा रेड्डी यांनी केली.

भाजप नेते नारायणस्वामी यांनी राज्याबद्दल बोलण्यापूर्वी केंद्राकडून थकीत असलेला नरेगा आणि इतर निधी मिळवण्यासाठी पाठपुरावा करावा, अशी प्रतिक्रिया त्यांनी व्यक्त केली. दररोज २५ ते ३० लाख महिला शक्ती योजनेचा लाभ घेत आहेत आणि हे सहन होत नसल्यानेच भाजप महिलाविरोधी भूमिका घेत आहे, अशा शब्दांत त्यांनी नाराजी व्यक्त केली. स्वत:च्या चुकांकडे दुर्लक्ष करून आमच्या कामात त्रुटी शोधण्याचे काम भाजप करत आहे, असा टोलाही रामलिंगा रेड्डी यांनी लगावला.