देवेगौडा यांच्याशिवाय जनता दल सेक्युलर नाही, यडियुराप्पा यांच्याशिवाय भाजप नाही, त्याचप्रमाणे सिद्धरामय्या यांच्याशिवाय काँग्रेस नाही, असे स्फोटक विधान माजी मंत्री के. एन. राजण्णा यांनी केले आहे. सिद्धरामय्या यांनी मुख्यमंत्रीपदी कायम राहावे, अशी त्यांची इच्छा असल्याचेही त्यांनी स्पष्ट केले.

चामराजनगर येथे माध्यम प्रतिनिधींशी बोलताना त्यांनी हे वक्तव्य केले. म्हैसूरमध्ये डी. के. सुरेश यांनी ‘सिद्धरामय्या बोलल्याप्रमाणे वागतात, दिलेला शब्द मोडत नाहीत’ असे जे विधान केले होते, त्यावर त्यांनी प्रतिक्रिया दिली. ‘कुणी कुणाला काय शब्द दिला, हे त्या दोघांनाच माहीत आहे,’ असे राजण्णा म्हणाले. सिद्धरामय्या पाच वर्षे मुख्यमंत्रीपदी राहणार नाहीत, या भाजपच्या टीकेला प्रत्युत्तर देताना त्यांनी, “भाजपच्या लोकांना कधी सत्य बोलण्याची सवय आहे का?” असा सवाल केला. सध्या सिद्धरामय्या मुख्यमंत्री असून, मुख्यमंत्री खुर्ची रिकामी नाही, असेही त्यांनी स्पष्ट केले.

पुढे बोलताना त्यांनी देवेगौडांशिवाय जेडीएस नाही, यडियुराप्पांशिवाय भाजप नाही आणि त्याचप्रमाणे सिद्धरामय्या यांच्याशिवाय काँग्रेस नाही, असे ठामपणे सांगितले. मी मंत्री होणार की नाही, हे माहीत नाही, पण सिद्धरामय्या मुख्यमंत्रीपदी असणे हे माझ्यासाठी महत्त्वाचे आहे, असेही त्यांनी नमूद केले.