गुर्लापूर येथील ऊस उत्पादकांच्या आंदोलनादरम्यान सरकारने सर्वांना विश्वासात न घेता केवळ काही लोकांचे ऐकून शेतकऱ्यांची फसवणूक केली, असा गंभीर आरोप कर्नाटक राज्य शेतकरी संघटनेचे प्रमुख प्रकाश नाईक यांनी केला आहे.

आज पत्रकार परिषद घेऊन त्यांनी आपले मत मांडले. ते म्हणाले की, ऊस उत्पादकांना आधारभूत किंमत मिळावी यासाठी गुर्लापूर येथे झालेल्या आंदोलनात सरकार आणि जिल्हा प्रशासनाने शेतकऱ्यांशी द्रोह केला आहे. शेतकऱ्यांचे व्यासपीठ हे अन्नदात्यांचे व्यासपीठ आहे. या व्यासपीठावरून लोकप्रतिनिधींना अपशब्द वापरून हिणवणे योग्य नाही, असे नाईक यांनी स्पष्ट केले.

राजकीय विषयावर भाष्य करताना त्यांनी उपमुख्यमंत्री डी. के. शिवकुमार यांना थेट आव्हान दिले. ते म्हणाले, “सिद्धरामय्या हे डी. के. शिवकुमार यांना कधीही मुख्यमंत्री करणार नाहीत. एफआरपी वगळता, जर डी. के. शिवकुमार यांनी त्यांच्या मालकीच्या साखर कारखान्यात तरी ऊसाला प्रति टन ३५०० रुपये जाहीर केले, तर ते निश्चितच मुख्यमंत्री होतील.”

“कर्नाटक शेतकरी संघटनेच्या कोणत्याही पदाधिकाऱ्याला, ज्येष्ठांना किंवा आंदोलकांना विश्वासात न घेता निर्णय घेण्यात आले. अध्यक्ष आणि गुरुजी यांच्यात कोणताही ताळमेळ नव्हता, त्यामुळे आम्ही हे निर्णय फेटाळून लावले आहेत,” असे नाईक म्हणाले. जिल्हाधिकारी यांनी सरकारच्या बाहुल्याप्रमाणे काम करत शेतकरी संघटनांना तोडण्याचे काम केले आहे. “काळचक्र फिरत असते. कोणाचे नशीब कोण लिहिते, हे पुढे कळेल,” अशा शब्दांत त्यांनी आपला संताप व्यक्त केला.

यावेळी शेतकरी संघटनेचे प्रमुख पदाधिकारी उपस्थित होते