बेळगावात उद्या होणाऱ्या कर्नाटक राज्योत्सवाची तयारी पूर्ण झाली असून, शहरात विविध ठिकाणी सजावट करण्यात आली आहे.

महापौर प्रीती कामकर, उपमहापौर हनुमंत कोंगाळी आणि महानगरपालिका आयुक्त कार्तिक एम. यांच्यासह अधिकाऱ्यांच्या पथकाने राज्योत्सवाच्या मिरवणूक मार्गाची, प्रेक्षक गॅलरीची आणि कार्यक्रमाच्या व्यासपीठाच्या तयारीची पाहणी केली.

राणी चन्नम्मा चौकासह शहरातील प्रमुख रस्त्यांवर राजवाड्यांच्या प्रतिकृती, फुलांची सजावट आणि शुभेच्छा फलक उभारण्यात आले आहेत. नागरिकांनी शांततेत आणि एकोप्याने उत्सव साजरा करावा, असे आवाहन महापौरांनी केले.

उत्सवाच्या व्यवस्थेबाबत माहिती देताना उपमहापौर हनुमंत कोंगाळी आणि आयुक्त कार्तिक एम. यांनी सांगितले की, नागरिकांच्या सोयीसाठी महानगरपालिकेने सुमारे दोन ते अडीच कोटी रुपये खर्चून तयारी केली आहे. महानगरपालिकेकडून गणेशोत्सव, आंबेडकर जयंती आणि राज्योत्सवाचे आयोजन केले जाते. यंदाही आवश्यक खबरदारी घेण्यात आली आहे. सर्व कन्नड संघटना आणि कन्नड भाषिकांनी मोठ्या संख्येने सहभागी व्हावे, असे आवाहन आयुक्तांनी केले.

महानगरपालिकेच्या तयारीबद्दल तसेच लक्ष्मी निपाणीकर यांच्यासह अधिकारी आणि कर्मचाऱ्यांनी घेतलेल्या मेहनतीबद्दल कन्नड समर्थक संघटनांच्या कार्यकर्त्यांनी आभार व्यक्त केले. अन्य राज्यांतून येणाऱ्या लोकांची गैरसोय होऊ नये, यासाठी आवश्यक सुविधा उपलब्ध करून देण्यात आल्या आहेत.