बेळगाव सुवर्णसौध परिसरात शुक्रवारी सुवर्णसौधमध्ये बैठकीसाठी येणाऱ्या आमदारांच्या वाहनांना शेतकऱ्यांनी घेराव घालत तीव्र संताप व्यक्त केला आणि सरकारविरोधात जोरदार घोषणाबाजी केली.

बेळगाव सुवर्णसौध परिसरात अत्यंत तणावपूर्ण वातावरण निर्माण झाले होते. एकीकडे सुवर्णसौधमध्ये मुख्यमंत्री डी. के. शिवकुमार हे साखर कारखाना मालकांसोबत बैठक घेत असताना, दुसरीकडे उसाला न्याय्य दर मिळावा या मागणीसाठी हजारो ऊस उत्पादक शेतकऱ्यांनी राष्ट्रीय महामार्ग रोखून धरत प्रचंड निदर्शने केली.

सुवर्णसौधमध्ये बैठकीसाठी येणाऱ्या आमदारांच्या गाड्यांना शेतकऱ्यांनी घेराव घालत तीव्र संताप व्यक्त केला आणि सरकारविरोधात जोरदार घोषणाबाजी केली.

राज्य शेतकरी संघाचे प्रदेशाध्यक्ष चुनप्पा पुजारी यांनी राज्य सरकारने प्रतिटन उसाला अतिरिक्त १,००० रुपये प्रोत्साहनपर अनुदान द्यावे, तसेच वजन काटे (वे ब्रिज) आणि जागा खरेदीसाठी ५०० कोटी रुपयांचा निधी मंजूर करावा, अशी आक्रमक मागणी केली. मुख्यमंत्र्यांच्या बैठकीतून शासनाकडून स्पष्ट घोषणा झाली तरच आंदोलन मागे घेतले जाईल, असे त्यांनी स्पष्ट केले.

शासनासोबतची बैठक निष्फळ ठरल्यास किंवा मागण्या पूर्ण न झाल्यास आंदोलन अधिक तीव्र करण्याचा इशारा शेतकरी नेत्यांनी दिला आहे. २६ नोव्हेंबर रोजी हुबळी येथे भव्य आंदोलन उभारण्यात येईल आणि पुढील लढा हा शेतकरी नेत्यांच्या नियंत्रणाबाहेर जाऊन राज्यभरात अत्यंत उग्र रूप धारण करेल, असा सज्जड इशारा त्यांनी दिला.

या वेळी बोलताना एका महिला शेतकरी नेत्याने, शासनाची ही बैठक म्हणजे केवळ ‘डोळ्यात धूळफेक’ असून दुष्काळाच्या पार्श्वभूमीवर तामिळनाडूच्या धर्तीवर प्रोत्साहनपर अनुदान दिले पाहिजे आणि स्वामीनाथन आयोगाच्या अहवालानुसार उसाचा दर निश्चित केला पाहिजे, अशा शब्दांत सरकारवर कडाडून हल्ला चढवला.

शेतकऱ्यांनी अचानक केलेल्या रस्ता रोको आंदोलनामुळे राष्ट्रीय महामार्गावर किलोमीटरच्या अंतरापर्यंत वाहनांच्या लांबच लांब रांगा लागल्या होत्या, ज्यामुळे प्रवाशांचे प्रचंड हाल झाले. परिस्थिती तणावपूर्ण बनत असल्याचे पाहून शहर पोलीस आयुक्त प्रकाश निकम आणि पोलीस उपआयुक्त (DCP) एन. व्ही. बरमनी यांनी घटनास्थळी धाव घेऊन आंदोलनकर्त्या शेतकऱ्यांची समजूत काढली. त्यानंतर शेतकऱ्यांनी महामार्गावरील वाहतूक मोकळी करून सुवर्णसौधच्या मुख्य प्रवेशद्वारासमोर आपले आंदोलन सुरू ठेवले.