बेळगाव तालुक्यातील बाळेकुंद्री बी. के. येथील मदरशाच्या आवारात नवीन हॉलच्या कामाचे भूमिपूजन आमदार लक्ष्मी हेब्बाळकर यांच्या हस्ते पार पडले.

विद्यार्थ्यांना अभ्यासासाठी आणि इतर उपक्रमांसाठी अनुकूल वातावरण मिळावे या उद्देशाने या हॉलची उभारणी केली जात आहे. यामुळे विद्यार्थ्यांना शैक्षणिक उपक्रम, सभा आणि इतर कार्यक्रमांसाठी मोठी सोय होणार आहे.

याप्रसंगी बोलताना आमदार लक्ष्मी हेब्बाळकर म्हणाल्या की, मुलांना उत्तम शिक्षण आणि आवश्यक पायाभूत सुविधा पुरवणे ही सर्वांची जबाबदारी आहे. कोणत्याही समाजातील मुले असली तरी त्यांना शिकण्यासाठी योग्य वातावरण मिळाले पाहिजे. शिक्षणाच्या माध्यमातूनच मुलांचे भवितव्य उज्ज्वल करणे शक्य आहे.

ग्रामीण भागातील शैक्षणिक संस्था आणि विद्यार्थ्यांच्या गरजा ओळखून विकासकामांना प्राधान्य दिले जात असून, हे काम दर्जेदार व वेळेत पूर्ण केले जाईल, असे त्यांनी नमूद केले.

या हॉलच्या निर्मितीमुळे मदरशातील विद्यार्थ्यांसोबतच विविध उपक्रमांसाठी ग्रामस्थांनाही लाभ होणार असून, या कामामुळे स्थानिक नागरिकांमधून समाधान व्यक्त होत आहे.

यावेळी विधान परिषद सदस्य चन्नराज हट्टीहोळी, मदरसा व्यवस्थापन समितीचे सदस्य, स्थानिक लोकप्रतिनिधी आणि नागरिक उपस्थित होते.