महाराष्ट्र आणि कर्नाटकच्या सीमेवरील प्रसिद्ध पर्यटन स्थळ असलेल्या अंबोली येथील महादेवगड पॉईंटवर एक अत्यंत दुर्दैवी घटना घडली आहे. मित्रांसोबत पर्यटनासाठी आलेले निपणी तालुक्यातील प्रसिद्ध डॉक्टर अयुब सय्यद (वय ४६) हे खोल दरीत कोसळून बेपत्ता झाले आहेत.

निपणी तालुक्यातील जत्राट येथील रहिवासी असलेले डॉ. अयुब सय्यद हे मंगळवारी (४ ऑगस्ट) आपल्या मित्रांसोबत अंबोली येथे फिरण्यासाठी गेले होते. सायंकाळी ५:३० च्या सुमारास महादेवगड पॉईंटवर मित्रांसोबत वेळ घालवत असताना “मी जरा पुढे जाऊन येतो” असे सांगून ते थोडे बाजूला गेले. मात्र, त्या वेळी परिसरात प्रचंड दाट धुके पसरलेले असल्याने पुढील रस्ता स्पष्ट न दिसल्याने त्यांचा पाय घसरला आणि ते थेट खोल दरीत कोसळले असा संशय व्यक्त केला जात आहे.

बराच वेळ उलटूनही डॉ. सय्यद परत न आल्याने घाबरलेल्या मित्रांनी आजूबाजूला शोध सुरू केला. ते दरीत कोसळले असावेत असा अंदाज आल्यानंतर त्यांनी तत्काळ स्थानिक पोलिसांना याची माहिती दिली. घटनेची माहिती मिळताच अंबोलीचे पोलीस निरीक्षक राजेंद्र म्हाप्रळकर (राजेंद्र माकडूम) आणि पथकाने घटनास्थळी धाव घेऊन आपत्कालीन बचाव पथकासह शोधमोहीम सुरू केली.

काल रात्री उशिरापर्यंत पोलीस आणि स्थानिक आपत्कालीन पथकांनी शोध घेतला, मात्र डॉक्टरांचा कोणताही पत्ता लागला नाही. परिसरात असलेले दाट धुके आणि अंधारामुळे रात्रीची शोधमोहीम तात्पुरती थांबवण्यात आली होती.

आज सकाळपासूनच अंबोली पोलीस आणि साहसी बचाव पथकांकडून संयुक्तपणे महादेवगड दरीत पुन्हा एकदा शोधमोहीम तीव्र करण्यात आली आहे. या घटनेमुळे निपणी आणि अंबोली परिसरात चिंतेचे आणि भीतीचे वातावरण पसरले आहे.