विविध सरकारी पदांच्या भरती परीक्षांमध्ये झालेला घोटाळा आणि ओएमआर शीट टॅम्परिंगचा निषेध करत एबीव्हीपी कार्यकर्त्यांनी बेळगावच्या राणी चन्नम्मा चौकात भव्य निषेध मोर्चा काढला.

बेळगावच्या राणी चन्नम्मा चौकात आज विविध सरकारी भरती परीक्षांमधील अनियमितता आणि ओएमआर शीटमधील छेडछाडीविरोधात एबीव्हीपी कार्यकर्त्यांनी जोरदार निदर्शने केली. पशुवैद्यकीय अधिकारी पदासाठी लाखो रुपयांची लाच घेण्यात आल्याचा आरोप आंदोलकांनी केला. राज्य सरकार आणि केइए प्रशासनाविरोधात संताप व्यक्त करत कार्यकर्त्यांनी जिल्हाधिकाऱ्यांमार्फत निवेदन सादर केले.

राणी चन्नम्मा चौकात जमलेल्या शेकडो एबीव्हीपी कार्यकर्त्यांनी राज्य सरकारवर जोरदार हल्लाबोल केला. प्रसारमाध्यमांशी बोलताना प्रथम प्रमोद पाटील यांनी आरोप केला की, केपीएससीद्वारे होणाऱ्या पशुवैद्यकीय अधिकारी भरतीमध्ये ७० ते ८० लाख रुपयांची लाच घेतली जात आहे. गुणवंत व गरीब विद्यार्थ्यांना डावलून पैसेवाल्यांना पदे विकली जात आहेत. यासोबतच, पीसी परीक्षेतील तांत्रिक त्रुटी आणि प्रश्नपत्रिकांचे क्रमांक बदलल्यामुळे १२९ विद्यार्थ्यांवर तीव्र अन्याय झाला असल्याचे त्यांनी सांगितले.

आंदोलनात बोलताना दुसरे नेते रोहित आळकुंटे म्हणाले की, जुलैमध्ये जाहीर झालेल्या ४०० पशुवैद्यकीय अधिकारी पदांच्या निकालात मोठा गैरव्यवहार झाला आहे. तसेच ३ जुलै रोजी झालेल्या पीसी परीक्षेत तिकोटी येथे अर्धा तास उशिरा प्रश्नपत्रिका देऊन विद्यार्थ्यांना मानसिक त्रास देण्यात आला. ओएमआर शीट टॅम्परिंग होत असूनही राज्यात कायद्याचा धाक राहिलेला नाही. या सर्व हलगर्जीपणा आणि गैरव्यवहाराची थेट जबाबदारी स्वीकारून राज्याचे गृहमंत्री आणि केइए अध्यक्षांनी तत्काळ आपल्या पदाचा राजीनामा द्यावा, अशी मागणी त्यांनी केली.

यावेळी मोठ्या संख्येने एबीव्हीपी कार्यकर्ते उपस्थित होते.