कर्नाटक राज्य सरकारची मान्यता आणि बेळगावच्या कित्तूर राणी चन्नम्मा विद्यापीठाच्या संलग्नतेने चिकोडीच्या प्रतिष्ठित सीएलई पदवी महाविद्यालयात या भागातील प्रथमच ‘बॅचलर ऑफ हॉटेल मॅनेजमेंट’ हा रोजगारप्रधान अभ्यासक्रम सुरू करण्यात येत असल्याची घोषणा संस्थेचे सचिव जगदीश कवतगीमठ यांनी केली.

चिकोडी येथील सीएलई संस्थेच्या कार्यालयात आयोजित पत्रकार परिषदेत बोलताना त्यांनी या अभ्यासक्रमाची माहिती दिली. तीन वर्षांच्या या पदवी कोर्समध्ये हॉटेल्स, रिसॉर्ट्स आणि हॉस्पिटॅलिटी क्षेत्रातील व्यावहारिक प्रशिक्षणावर विशेष भर दिला जाणार असल्याचे त्यांनी स्पष्ट केले.

हा कोर्स पूर्ण केल्यानंतर विद्यार्थ्यांना देश-विदेशातील पर्यटन आणि आदरातिथ्य क्षेत्रात नोकरीच्या संधी उपलब्ध होणार आहेत. तसेच विद्यार्थी स्वतःचा हॉटेल किंवा कॅटरिंग व्यवसाय सुरू करू शकतात किंवा विविध स्पर्धा परीक्षांसाठी पात्र ठरू शकतात, असे कवतगीमठ यांनी नमूद केले. कोणत्याही शाखेतून पीयूसी उत्तीर्ण झालेले विद्यार्थी या कोर्ससाठी प्रवेश घेऊ शकतात.

या पत्रकार परिषदेत श्रीकांत चन्नवर, एन. एस. वंटमुरे, मल्लिकार्जुन कवतगीमठ आणि प्राचार्यांसह अनेक मान्यवर उपस्थित होते, अशी माहिती देण्यात आली.