बंगळुरू येथे प्रसारमाध्यमांशी बोलताना माजी उपमुख्यमंत्री आणि अथणीचे विद्यमान आमदार लक्ष्मण सवदी यांनी राज्यातील राजकीय घडामोडी आणि कृष्णा नदीच्या पाणीपातळीबाबत महत्त्वपूर्ण वक्तव्य केले. जेडीएस नेते एच. डी. कुमारस्वामी यांच्याबाबत आपण केलेले विधान आता तंतोतंत खरे ठरले आहे, अशी खोचक टीका त्यांनी केली.

विधानसभेत भाजप-जेडीएस युती होण्यापूर्वी भाजपचा प्रदेशाध्यक्ष आणि विरोधी पक्षनेता ठरला नव्हता. या पार्श्वभूमीवर, आपण पूर्वी भाजपमध्ये असल्याने आपल्याला याबाबत काही माहिती असेल, असे जेडीएस नेते जी. टी. देवेगौडा म्हणाले होते, अशी आठवण लक्ष्मण सवदी यांनी करून दिली. त्याला उत्तर देताना, काही दिवसांतच कुमारस्वामी यांना ‘डेप्युटेशन’वर (प्रतिनियुक्तीवर) घेतले जाईल, असे आपण म्हटले होते आणि ते आता अक्षरशः खरे ठरले आहे, असा टोला लक्ष्मण सवदी यांनी लगावला.

दरम्यान, कृष्णा नदीच्या परिस्थितीबाबत बोलताना त्यांनी सांगितले की, तब्बल एका महिन्यानंतर नदीमध्ये पाण्याची आवक सुरू झाली आहे. गतवर्षी मे महिन्यातच पाऊस सुरू झाल्याने जूनमध्ये नदी भरली होती; मात्र यंदा नदी कोरडी पडल्याने शेतकऱ्यांच्या पंपसेटची वीज तोडण्यात आली होती. नदीत ४ ते ५ लाख क्युसेक पाणी आल्यानंतरच ती धोक्याची पातळी ओलांडते, त्यामुळे सध्यातरी पुराचा कोणताही धोका नाही. आलमट्टी आणि नारायणपूर ही धरणे भरणे अद्याप बाकी असून, सरकार परिस्थितीचा आढावा घेऊन पुढील पावले उचलेल. तसेच, येत्या गुरुवारी मुख्यमंत्री डी. के. शिवकुमार बेळगावचा दौरा करून जिल्हास्तरीय बैठक घेणार आहेत, अशी माहिती लक्ष्मण सवदी यांनी दिली.