कित्तूर तालुक्यात चिकबागेवाडी आणि एम. के. हुबळी दरम्यान एका भीषण रस्ते अपघातात दुचाकीस्वाराचा जागीच मृत्यू झाला. भरधाव आलेल्या अज्ञात वाहनाने दुचाकीला धडक दिल्याने हा अपघात घडला.

बेळगाव जिल्ह्यातील कित्तूर तालुक्यात एका भीषण रस्ते अपघाताची घटना समोर आली आहे. भरधाव वेगाने आलेल्या एका अज्ञात वाहनाने दुचाकीला जोरदार धडक दिली. या अपघातात दुचाकीस्वाराचा जागीच मृत्यू झाला असून, ही घटना चिकबागेवाडी आणि एम. के. हुबळी दरम्यान घडली आहे.

बैलहोंगल तालुक्यातील तिगडी गावचे रहिवासी असलेले यासीन (वय ४५) असे मृत व्यक्तीचे नाव आहे. यासीन हे एम. के. हुबळी येथून चिकबागेवाडी गावाच्या दिशेने आपल्या दुचाकीवरून जात असताना ही दुर्दैवी घटना घडली. वेगाने आलेल्या वाहनाने दुचाकीला धडक दिली आणि ते वाहन यासीन यांच्या डोक्यावरून गेल्याने त्यांचा जागीच मृत्यू झाला.

अपघात घडल्यानंतर संबंधित वाहनचालक घटनास्थळावरून फरार झाला आहे. घटनेची माहिती मिळताच कित्तूर पोलीस ठाण्याच्या पोलिसांनी घटनास्थळी भेट देऊन पाहणी केली. मृतदेह उत्तरीय तपासणीसाठी पाठवण्यात आला असून, पोलिसांनी ‘हिट अँड रन’चा गुन्हा दाखल केला आहे. सध्या पोलीस फरार चालकाचा शोध घेत आहेत.