आमदार आसीफ सेठ यांनी किल्ला तलावाला भेट देऊन परिसरातील सांडपाण्याची व्यवस्था सुधारण्यासाठी आणि पुराचा धोका टाळण्यासाठी सुरू असलेल्या नाल्यांच्या विकासकामांची पाहणी केली. .

गेल्या महिन्यात आमदारांनी या नाला विकास प्रकल्पासाठी ८ कोटी रुपयांचा निधी मंजूर करून आणला होता. मान्सूनच्या काळात हा प्रकल्प अत्यंत निर्णायक ठरणार आहे. हे काम पूर्ण झाल्यानंतर नजीकच्या निवासी भागातील पाणी साचणे, गटारी तुंबणे आणि पूरसदृश परिस्थिती निर्माण होणे यांसारख्या जुन्या समस्यांपासून नागरिकांना दिलासा मिळणार आहे. पाहणी दरम्यान आसीफ सेठ यांनी स्थानिक नागरिक, नगरसेवक आणि महानगरपालिका आयुक्तांशी चर्चा केली. मुसळधार पावसात निर्माण होणाऱ्या तांत्रिक अडचणींबाबत त्यांनी प्रशासनाकडून माहिती घेतली. केवळ तात्पुरती मलमपट्टी न करता दीर्घकालीन उपाययोजनांवर भर देण्याचे तसेच विहित मुदतीत काम पूर्ण करण्याचे आदेश त्यांनी अधिकाऱ्यांना दिले.

पावसाळी नाल्यांच्या पायाभूत सुविधांचे सक्षमीकरण करणे हे घरे, रस्ते आणि सार्वजनिक मालमत्तेच्या रक्षणासाठी अनिवार्य असल्याचे आमदारांनी स्पष्ट केले. विशेषतः पावसाळ्यात सखल भागात राहणाऱ्या नागरिकांना मोठा त्रास सहन करावा लागतो, त्यामुळे पावसाच्या पाण्याचा निचरा योग्य पद्धतीने व्हावा आणि भविष्यात पुराचा धोका निर्माण होऊ नये, यासाठी सर्व आवश्यक पावले उचलली जात असल्याची ग्वाही त्यांनी यावेळी रहिवाशांना दिली. असे त्यांनी म्हटले.

यावेळी महानगरपालिकेच्या अधिकाऱ्यांनी प्रकल्पाच्या तांत्रिक बाबींची माहिती आमदारांना दिली आणि काम वेळेत पूर्ण होईल, असा विश्वास दिला. नाला विकासामुळे वारंवार उद्भवणाऱ्या सांडपाण्याच्या समस्येतून कायमची सुटका होईल, अशी भावना स्थानिक नागरिकांनी व्यक्त केली. अशी प्रतिक्रिया त्यांनी व्यक्त केली.