बागलकोट जिल्ह्यातील शिरूर गावात एका विवाहितेला सासू, सासरे आणि दीराने मारहाण केल्याची धक्कादायक घटना घडली आहे. एका छोट्याशा वादातून हे प्रकरण विकोपाला गेले आणि विवाहितेवर जबर मारहाण करण्यात आली, ज्यात ती गंभीर जखमी झाली आहे.

बागलकोट जिल्ह्यातील शिरूर गावातील भाग्यश्री नावाच्या नववीत शिकणाऱ्या विद्यार्थिनीने तिच्या आजी-आजोबांकडे वही मागितली. त्यावेळी आजी-आजोबांनी “तुला वही कशाला हवी? आता पुरे झाले, तुझे लग्न करून देऊ” असे म्हटले. मुलीने मागितलेली वस्तू देत नसल्याचे पाहून भाग्यश्रीची आई रेणव्वा यांनी आपल्या सासू-सासऱ्यांना “तिला असे का म्हणता, तिला शिकायचे आहे, तिला शिकू द्या” असे विचारले.

याच प्रश्नावरून वाद सुरू झाला आणि तो इतका वाढला की सासू शारव्वा, सासरे हनुमंता आणि दीर शेखप्पा यांनी मिळून सून रेणव्वा यांना बेदम मारहाण केली. या मारहाणीत त्यांच्या शरीरावर अनेक ठिकाणी मार लागला असून डोक्यातूनही रक्त वाहत होते. पीडित महिला रेणव्वा यांना उपचारासाठी बागलकोट येथील जिल्हा रुग्णालयात दाखल करण्यात आले आहे.