धारवाड मधील एका निवृत्त प्राध्यापकांचे निधन झाल्यानंतर त्यांच्या कुटुंबीयांनी त्यांचे पार्थिव धारवाडच्या एसडीएम रुग्णालयाला दान देऊन, आपल्या दुःखातही एक आदर्शवत कार्य केले आहे. धारवाडमधील विश्वभारती कॉलनीमध्ये राहणारे निवृत्त प्राध्यापक मल्लिकार्जुन यडळ्ळी (८७) यांचे रविवारी निधन झाले. त्यांनी यापूर्वीच एसडीएम रुग्णालयाला देहदान करण्याची लेखी इच्छा व्यक्त केली होती.

प्रा. मल्लिकार्जुन यांच्या इच्छेनुसार, त्यांच्या कुटुंबीयांनी त्यांचे पार्थिव एसडीएम रुग्णालयाकडे सोपवले. कुटुंबाने एका सदस्याला गमावल्याचे दु:ख असतानाही, त्यांनी देहदान करून प्राध्यापकांची अंतिम इच्छा पूर्ण केली. मृत प्राध्यापकांनी बेळगाव जिल्ह्यातील संकेश्वर येथील एल.के. खोत महाविद्यालयात इंग्रजीचे प्राध्यापक म्हणून आणि नंतर त्याच महाविद्यालयाचे प्राचार्य म्हणूनही सेवा बजावली होती.

‘वडिलांनी आधीच देहदान करण्याची इच्छा व्यक्त केली होती. त्यानुसार आम्ही त्यांचे देहदान करण्याचा निर्णय घेतला,’ अशी प्रतिक्रिया त्यांचे पुत्र डॉ. अरुण यडळ्ळी यांनी व्यक्त केली.