चित्रपट अभिनेता दर्शन याचे चाहते समाज माध्यमांवर वादग्रस्त प्रतिक्रिया देत असताना, दुसरीकडे किच्चा सुदीपच्या एका चाहत्याने मात्र एका गरजू कुटुंबासाठी घर बांधून माणुसकीचा नवा आदर्श घालून दिला आहे. बेळगावच्या मार्कंडेय गावात ही घटना घडली आहे. चित्रपट अभिनेते किंवा अभिनेत्रींच्या चाहत्याचे काम केवळ चित्रपट पाहण्यापुरते मर्यादित नाही, हे मार्कंडेय गावातील आदिशेष नायक या तरुणाने दाखवून दिले आहे. त्याने एका गरीब वृद्ध महिलेसाठी घर बांधून समाजाची प्रशंसा मिळवली आहे.

माविनहोळी गावातील रत्नावा चंडूर ही वृद्ध महिला आपल्या सहा नातवंडांसोबत एका मोडकळीस आलेल्या घरात राहत होती. आई-वडिलांना गमावलेल्या नातवंडांची तीच एकमेव आधार होती. मोलमजुरी करून ती कुटुंबाचा उदरनिर्वाह चालवत होती. या महिलेची व्यथा पाहून आदिशेषने तिला मदत करण्याचा निर्णय घेतला.

एकागुंठा जागेवर त्याने सर्व सोयींनी युक्त असे घर बांधले असून, ते पूर्ण होण्याच्या मार्गावर आहे. आदिशेष नायक हा किच्चा सुदीपचा कट्टर चाहता असून, येत्या २ सप्टेंबर रोजी सुदीपच्या वाढदिवसाच्या दिवशी या घराचा गृहप्रवेश करण्याचा त्याचा मानस आहे. घराचा गिलावा, रंगकाम आणि वायरिंगचे काम अजून बाकी असून, ते लवकरच पूर्ण करून घराचे हस्तांतरण करण्यात येणार आहे. अनाथांना आधार देण्याच्या या माणुसकीच्या कार्याचे सर्वत्र कौतुक होत आहे. ‘चाहते असेच असावेत’, असे म्हणत सुदीपच्या इतर चाहत्यांनीही आदिशेषच्या कार्याची प्रशंसा केली आहे.