उपमुख्यमंत्री डी. के. शिवकुमार यांनी राष्ट्रीय स्वयंसेवक संघाचे गीत म्हणणे आणि प्रयागराजमध्ये गंगास्नान करणे हे त्यांच्यात होत असलेले चांगले बदल आहेत, अशी प्रतिक्रिया राज्यसभा सदस्य इराण्णा कडडी यांनी व्यक्त केली. तसेच मुख्यमंत्री सिद्धरामय्या कमकुवत असून, राज्य सरकारच्या अधिकाराची सूत्रे हायकमांडने आपल्या हातात घेतली आहेत, असा आरोपही त्यांनी केला.

आज बेळगावमध्ये आयोजित पत्रकार परिषदेत ते बोलत होते. यंदा लवकर सुरू झालेल्या मान्सूनमुळे सरासरीपेक्षा जास्त पाऊस झाला आहे. महाराष्ट्रातील पाणलोट क्षेत्रातही जोरदार पाऊस झाल्याने राजापूर आणि कोयना धरणातून अडीच लाख क्युसेक पाणी सोडले जात आहे. त्यामुळे कृष्णा आणि घटप्रभा नद्यांची पाणी पातळी वाढून पूरस्थिती निर्माण झाली आहे. या पुरामुळे ४३ पूल पाण्याखाली गेले असून, ५० लाख हेक्टरवरील पिकांचे आणि २ हजार हेक्टरवरील बागायती पिकांचे नुकसान झाले आहे. ३०० हून अधिक शाळांच्या खोल्या, ४४ अंगणवाड्या, ३ प्राथमिक आरोग्य केंद्रे खराब झाली असून, १,८४० कुटुंबांनी मदत छावण्यांमध्ये आश्रय घेतला आहे. या दुर्घटनेत ७ जणांचा मृत्यू झाला असून, मृतांच्या कुटुंबीयांना ५ लाख रुपयांची मदत द्यावी, अशी मागणी त्यांनी केली.

सरकारने फक्त मदत छावण्या उघडू नये, तर एसडीआरएफच्या नियमांनुसार घरांच्या बांधकामासाठी अतिरिक्त मदत द्यावी. तसेच, पिकांचे नुकसान झालेल्या शेतकऱ्यांना अतिरिक्त भरपाई दिल्यास त्यांना दिलासा मिळेल. खराब झालेल्या रस्त्यांची दुरुस्ती युद्धपातळीवर करावी, असेही ते म्हणाले.

धर्मस्थळ प्रकरणावर बोलताना कडाडी म्हणाले, “आम्ही सुरुवातीलाच अज्ञात व्यक्तीला ‘धक्का मारून बाहेर काढू’ असे म्हटले होते. स्वतः उपमुख्यमंत्र्यांनी ‘अदृश्य हातांमुळे’ धर्मस्थळावर अन्याय झाला असे म्हटले होते. ते आता सरकारचा भाग आहेत, त्यामुळे त्यांनीच याचे स्पष्टीकरण द्यावे.” नोव्हेंबर क्रांतीच्या दिवशी त्यांनी हे विधान केले असावे, असा टोलाही त्यांनी लगावला. काँग्रेसमध्ये अनेक ‘क्रांत्या’ घडत आहेत. डी. के. शिवकुमार प्रयागराजला गेले होते आणि नुकतेच त्यांनी आमच्या संघटनेचे गीत म्हटले, ही एक चांगली गोष्ट आहे, असे ते म्हणाले.

राज्य सरकार राज्याऐवजी केरळमधील वायनाडसाठी मदत वितरीत करत असल्याबद्दल विचारले असता, ते म्हणाले की, राज्य सरकार केंद्रातील हायकमांडला खूश करण्यात व्यस्त आहे. ते राज्यातील शेतकऱ्यांना विसरले आहेत. सिद्धरामय्या कमकुवत झाले आहेत. मुख्यमंत्र्यांनी त्यांच्या मंत्रिमंडळात जातगणनेवर चर्चा करण्याऐवजी राज्याच्या प्रभारींसोबत चर्चा केली आहे. काँग्रेसच्या हायकमांडने राज्य सरकारच्या अधिकाराची सूत्रे आपल्या हातात घेतली आहेत, असा आरोप कडाडी यांनी केला.