बेळगाव जिल्हा रुग्णालयाच्या सुपर स्पेशालिटी विभागात कर्मचाऱ्यांच्या निष्काळजीपणामुळे शस्त्रक्रियेसाठी आलेल्या एका महिलेला अर्धा तास बाहेरच सोडून दिल्याची धक्कादायक घटना घडली आहे. या घटनेनंतर रुग्णालयाच्या अनागोंदी कारभाराबद्दल नागरिकांनी संताप व्यक्त केला आहे.

बैलहोंगल तालुक्यातील हणबरहट्टी गावातील एक महिला १५ दिवसांपूर्वी पायाच्या फ्रॅक्चरवर शस्त्रक्रिया करून परत आली होती. पुन्हा एकदा तपासणी आणि पुढील शस्त्रक्रियेसाठी ती बीम्सच्या सुपर स्पेशालिटी रुग्णालयात आली होती.

रुग्णालयातील कर्मचारी तिला वॉर्डमधून शस्त्रक्रियेसाठी घेऊन जात असताना, त्यांनी महिलेला रुग्णालयाच्या बाहेर सोडून दिले. मल्टी सुपर स्पेशालिटी रुग्णालयाकडून जुन्या इमारतीतील फ्रॅक्चर शस्त्रक्रिया विभागाकडे तिला घेऊन जाण्यासाठी रुग्णवाहिका न आल्याने ती महिला अर्धा तास स्ट्रेचरवर तशीच पडून होती. जोरदार पाऊस सुरू असतानाही कर्मचाऱ्यांनी तिला रुग्णालयाच्या गाडीत टाकले. या भयंकर थंडीत स्ट्रेचरवर पडून असलेल्या रुग्णाची ही अवस्था पाहून नागरिकांनी बीम्स प्रशासनावर तीव्र संताप व्यक्त केला.