राज्य सरकारने विविध मागण्यांकडे दुर्लक्ष केल्याचा आरोप करत परिवहन कर्मचाऱ्यांनी पुकारलेला बेमुदत संप अखेर मागे घेण्यात आला आहे. त्यामुळे आजपासून बससेवा पुन्हा सुरू झाल्याने प्रवाशांनी सुटकेचा निश्वास सोडला आहे.

गेल्या काही दिवसांपासून सुरू असलेल्या या संपामुळे राज्यभरातील बस वाहतूक ठप्प झाली होती. त्यामुळे शाळा-कॉलेजचे विद्यार्थी, नोकरदार आणि इतर प्रवाशांना मोठ्या अडचणींचा सामना करावा लागला. विजापूर जिल्ह्यातही सकाळी ६ वाजल्यापासून कर्मचाऱ्यांनी संप पुकारल्याने प्रवाशांचे हाल झाले होते. मात्र, संपाविरोधात दाखल झालेल्या याचिकेवर सुनावणी करताना उच्च न्यायालयाने कर्मचाऱ्यांना संप तात्काळ मागे घेण्याचे निर्देश दिले. त्यानंतर कर्मचाऱ्यांनी न्यायालयात संप सुरू न ठेवण्याचे आश्वासन दिले.

या निर्णयानंतर विजापूरच्या केंद्रीय आणि सॅटेलाइट बसस्थानकातून बससेवा पुन्हा सुरू झाली. यामुळे शेजारच्या राज्यांमध्ये आणि इतर जिल्ह्यांमध्ये प्रवास करणाऱ्या प्रवाशांना मोठा दिलासा मिळाला आहे.