वंध्यत्वाचा शाप दूर करून, अपत्यहीन दांपत्यांना आशेचे पंख देण्यासाठी के.एल.ई. संस्था पुढे सरसावली आहे, ही आनंदाची बाब आहे, असे महिला व बालविकास मंत्री लक्ष्मी हेब्बाळकर यांनी सांगितले.

यावेळी बोलताना मंत्री लक्ष्मी हेब्बाळकर म्हणाल्या, “वेगाने विकसित होत असलेल्या बेळगावमधील के.एल.ई. रुग्णालय आणि डॉ. प्रभाकर कोरे यांच्या टीमची सेवा अमूल्य आहे. के.एल.ई. केवळ आरोग्य क्षेत्रातच नाही तर सर्वच क्षेत्रांमध्ये आघाडीवर आहे. राष्ट्रीय आणि आंतरराष्ट्रीय स्तरावर के.एल.ई.ने आपले नाव कमावले असून, जगातील अनेक प्रतिष्ठित व्यक्ती या संस्थेला भेट देतात. असे नेतृत्वगुण डॉ. प्रभाकर कोरे यांच्यात आहेत. आता नंदिश्र्वर यांच्या नेतृत्वाखाली के.एल.ई. अपत्यहीन दांपत्यांच्या आयुष्यात आशेचे पंख देण्यासाठी मोठे पाऊल टाकत आहे. हे केंद्रही जागतिक स्तरावर नावलौकिक मिळवो. आधुनिक जीवनशैलीमुळे अनेक दांपत्य मुलांना मुकत आहेत. वंध्यत्वाचा शाप दूर करून, बेळगावचे भविष्य घडवण्यासाठी के.एल.ई. सज्ज होत आहे.”

पुढे बोलताना त्या म्हणाल्या, “सामाजिक बांधिलकी, काळजी आणि तळमळ बाळगून यशाच्या शिखरावर कसे पोहोचावे, हे डॉ. प्रभाकर कोरे यांनी दाखवून दिले आहे. डॉ. प्रभाकर कोरे यांचे व्यक्तिमत्त्व असे आहे की ते सर्वच पक्षांसाठी आवश्यक आहेत. मलाही त्यांनी मार्गदर्शन आणि आशीर्वाद द्यावा. राजकारण म्हणजे जरी स्पर्धा असली तरी, कोरे यांच्यासारख्या मुत्सद्दी राजकारण्याचे व्यक्तिमत्त्व अनेक गोष्टी शिकवते. त्यांच्यावर पीएचडी करावी.”

के.एल.ई.चे कार्याध्यक्ष डॉ. प्रभाकर कोरे म्हणाले, “दानधर्मावर आधारित आणि लोकशाही पद्धतीने चालून जगात एवढी मोठी कामगिरी करणारी संस्था म्हणजे के.एल.ई. संस्था आहे. ही केवळ कोरे यांची संस्था नाही.” ते पुढे म्हणाले, “मुंबई, पुणे यांसारख्या शहरांमध्ये अशी रुग्णालये सुरू करण्याची अनेकांकडून मागणी आहे; परंतु सध्या ही संस्था बेळगावमध्ये सेवा देत आहे. या भागातील शैक्षणिक उणीव सप्तर्षींनी दूर केली आहे. आमच्यावर पीएचडी करण्याची आवश्यकता नाही; परंतु सरकारसोबत हातात हात घालून आरोग्य सेवा पुरवण्यासाठी आमची संस्था सज्ज आहे.”

यावेळी विविध मान्यवर आणि के.एल.ई.चे कर्मचारी उपस्थित होते. समारंभाचे अध्यक्षस्थान संस्थेचे कार्याध्यक्ष डॉ. प्रभाकर कोरे यांनी भूषवले. काहेरचे कुलगुरू डॉ. नितीन गंगाणे, जे.एन.एम.चे प्राचार्य डॉ. एन.एस. महांतशेट्टी हे सन्माननीय अतिथी म्हणून, तर वैद्यकीय संचालक डॉ. (कर्नल) एम. दयानंद हे अतिथी म्हणून उपस्थित होते.