बेळगाव शहरातील सह्याद्री नगरमधील आश्रय कॉलनीमध्ये बससेवा सुरू झाल्याने विद्यार्थी आणि स्थानिक नागरिकांना मोठा दिलासा मिळाला आहे.

अनेक वर्षांपासून सार्वजनिक वाहतुकीच्या सोयीअभावी शाळकरी मुलांना आणि महाविद्यालयीन विद्यार्थ्यांना दररोज किलोमीटर चालत जाऊन बस पकडावी लागत होती, ज्यामुळे त्यांची गैरसोय होत होती. आता महिला आणि बाल कल्याण मंत्री लक्ष्मी हेब्बाळकर यांच्या विशेष प्रयत्नांमुळे ही समस्या दूर झाली आहे.

मंगळवारी आश्रय कॉलनीतील केईबीजवळ बस पोहोचताच, स्थानिक रहिवाशांनी मोठ्या उत्साहात बसचे पूजन केले आणि पेढे वाटून आपला आनंद साजरा केला. या नवीन बससेवेमुळे विद्यार्थ्यांना आता आनंदाने शाळेत आणि कॉलेजमध्ये जाता येत आहे.

महानगरपालिकेचे नामनिर्देशित सदस्य मुस्ताक मुल्ला यांनी यावेळी बोलताना सांगितले की, आश्रय कॉलनीतील मुलांच्या बससेवेसाठी सुरू असलेल्या त्रासाबद्दल त्यांनी मंत्री लक्ष्मी हेब्बाळकर यांच्या निदर्शनास आणून दिले होते. त्यांच्याच पुढाकाराने ही बससेवा सुरू झाली असून, यामुळे विद्यार्थ्यांची सोय झाली आहे.

स्थानिक रहिवासी आयुब देसाई यांनीही मुस्ताक मुल्ला यांच्या प्रयत्नांचे कौतुक केले. एका महाविद्यालयीन विद्यार्थ्याने आपल्या भावना व्यक्त करताना सांगितले की, अनेक दिवसांपासून आश्रय कॉलनीत बस नसल्यामुळे त्यांना ५ किलोमीटर चालत जावे लागत होते, परंतु आता नवीन बसमुळे ही समस्या दूर झाली आहे. एका शाळकरी विद्यार्थिनीने सांगितले की, चन्नम्मा चौकातून धर्मवीर संभाजी चौकापर्यंत चालत जाणे खूप कठीण होते, मात्र आता कॉलनीतच बस आल्यामुळे त्यांचा प्रवास सुखकर झाला आहे.

यावेळी आश्रय कॉलनीतील अनेक रहिवासी आणि विद्यार्थी मोठ्या संख्येने उपस्थित होते, त्यांनी या नवीन बससेवेचे स्वागत केले.