येथील संत मीरा इंग्लिश मीडियम स्कूलमध्ये गुरुपौर्णिमेचा उत्सव उत्साहात साजरा करण्यात आला. या कार्यक्रमात प्रमुख अतिथी म्हणून सहभागी झालेल्या समाजसेविका ज्योती शेट्टी यांनी गुरुंचे महत्त्व विषद केले.

आपल्या भाषणात ज्योती शेट्टी म्हणाल्या, “आज आपण गुरुपौर्णिमा साजरी करत आहोत, हा दिवस आपल्या जीवनातील मार्गदर्शक असलेल्या गुरुंचा सन्मान करण्याचा दिवस आहे. गुरु आपल्या जीवनात ज्ञान, विवेक आणि योग्य मार्ग दाखवतात. ते आपल्या जीवनातील अंधार दूर करून प्रकाशाकडे घेऊन जातात.”

ज्योती शेट्टी पुढे म्हणाल्या की, “गुरु केवळ आपल्याला विद्याच देत नाहीत, तर जीवनातील मूल्यांचीही शिकवण देतात. ते आपल्यातील सुप्त प्रतिभा बाहेर आणतात आणि आपल्याला समाजासाठी उपयुक्त बनवतात. आपले व्यक्तिमत्त्व घडवण्यात त्यांची महत्त्वाची भूमिका असते. आपण आपल्या गुरुंचे नेहमीच कृतज्ञ राहिले पाहिजे. त्यांचे मार्गदर्शन आणि प्रेम आपल्याला नेहमीच आवश्यक आहे.”

कार्यक्रमात मुलांनी विविध वेशभूषा करून वेगवेगळ्या स्पर्धांमध्ये भाग घेतल्याबद्दल श्रीमती शेट्टी यांनी आनंद व्यक्त केला. त्या म्हणाल्या, “अशा विशेष प्रतिभेला प्रोत्साहन देऊन, त्यांच्या आवडीनिवडी वाढवून आणि त्यांना व्यासपीठावर संधी देऊन तुमच्या गुरुंनी मोठे कार्य केले आहे. तुम्ही सर्व विद्यार्थी समाजासाठी आणि देशासाठी एक महत्त्वाचे संसाधन बनण्याबरोबरच आपल्या भारतमातेची संस्कृती जपण्यासाठी व वाढवण्यासाठी, मानवी मूल्ये आणि देशभक्ती रुजवण्यासाठी पुढे यावे.”

गुरुपौर्णिमेच्या या शुभ प्रसंगी, तुम्हा सर्वांना आपल्या गुरुंचा सन्मान करण्याची आणि त्यांचे आशीर्वाद मिळवण्याची संधी मिळो, अशी आशा ज्योती शेट्टी यांनी व्यक्त केली. या कार्यक्रमात गुरुंचा आणि प्रतिभावान विद्यार्थ्यांचा सत्कार करण्यात आला.

याप्रसंगी समाजसेविका ज्योती शेट्टी, मुख्याध्यापिका सुजाता दप्तरदार, उपप्राचार्या नीता जाधव, समाजसेविका ट्विंकल गांधी आणि शिक्षिका लक्ष्मी यांसह इतर मान्यवर उपस्थित होते.