सेवानिवृत्तीच्या कार्यक्रमाच्या तयारीत असलेल्या धारवाड सार्वजनिक बांधकाम विभागाचे मुख्य अभियंता एच. सुरेश यांना आज लोकयुक्ताने मोठा धक्का दिला. त्यांच्या निवासस्थानावर टाकलेल्या छाप्यात मोठ्या प्रमाणावर रोकड, सोने आणि चांदीसह कोट्यवधी रुपयांची बेहिशेबी मालमत्ता आढळून आली आहे.

आज एच. सुरेश यांचा सेवानिवृत्तीचा कार्यक्रम खासगी मंगल कार्यालयात मोठ्या उत्साहात आयोजित करण्यात आला होता. परंतु, कार्यक्रम सुरू होण्यापूर्वीच लोकयुक्ताच्या अधिकाऱ्यांनी कारवाई करत मुख्य अभियंत्याच्या धारवाडमधील केसीडी सर्कलजवळच्या सरकारी निवासस्थानावर पहाटेच छापा टाकला. अनेक ठिकाणी बेकायदेशीर मालमत्ता आणि उत्पन्नापेक्षा अधिक संपत्ती जमवल्याच्या आरोपावरून लोकयुक्ताच्या पोलिसांनी हे सर्च ऑपरेशन केले.

लोकयुक्ताच्या छाप्यात मुख्य अभियंता एच. सुरेश यांच्या निवासस्थानी १३ लाख ४४ हजार रुपये रोख रक्कम आढळून आली. याशिवाय, दोन भूखंड आणि ५० लाख ५५ हजार रुपये किमतीची ६ व्यावसायिक दुकाने मिळाल्याचेही समोर आले. त्यांच्याकडे २ कोटी ६० लाख रुपये किमतीचे निवासी घर आणि फार्म हाऊस होते, तसेच अतिरिक्त ७६ हजार रुपये रोख रक्कम देखील सापडली. ३५ लाख ३६ हजार रुपये मूल्याची ११ एकर ३५ गुंठे शेतजमीन आणि बँकेत १ कोटी ६५ लाखांचे मुदत ठेव पत्र आढळून आले. सोन्यामध्ये २१ लाख ५८ हजार रुपये किमतीचे २४५ ग्रॅम सोने तर चांदीमध्ये २ लाख ३९ हजार रुपये मूल्याची २४९९ ग्रॅम चांदी जप्त करण्यात आली. याव्यतिरिक्त, एक बलेनो आणि एक किया सेल्टोस अशा दोन गाड्यांची माहिती देखील लोकयुक्ताला मिळाली आहे.

सेवानिवृत्तीच्या तयारीत असलेल्या मुख्य अभियंत्याला लोकयुक्ताने छापा टाकून त्यांची चौकशी केली आणि जप्त केलेल्या मालमत्तेची माहिती उघड केली.