बेळगावातील शाहूनगर परिसरातील उद्याने पावसाळ्यात आणि हिवाळ्यात हिरवीगार होऊन पर्यटकांना आकर्षित करण्याऐवजी सध्या दुरवस्थेमुळे चर्चेत आहेत. अपुऱ्या कामामुळे आणि देखभालीअभावी ही उद्याने पूर्णपणे निकामी झाली आहेत. पावसाचे पाणी साचल्याने दुर्गंधी पसरत असून, आरोग्याच्या समस्या निर्माण होण्याची भीती व्यक्त केली जात आहे.

शाहूनगर परिसरातील बहुसंख्य उद्यानांची स्थिती अत्यंत वाईट आहे. योग्य देखभालीअभावी उद्यानांच्या आवारात गवत आणि झुडपे वाढली आहेत. याशिवाय, काही नागरिक कचरा टाकून जात असल्याने उद्याने ही कचराकुंडी बनली आहेत. त्यामुळे नागरिकांना कुटुंबासोबत सुटीच्या दिवशी बाहेर जाऊन वेळ घालवणेही अशक्य झाले आहे. जर या उद्यानांची योग्य निगा राखली असती, तर नागरिकांना तिथे फिरणे शक्य झाले असते, परंतु त्यांच्या आशेवर अक्षरशः पाणी फिरले आहे.

गेल्या चार वर्षांपासून ‘बुडा’ या उद्यानाचा विकास करत आहे, मात्र हे काम अजूनही पूर्ण झालेले नाही. विशेष म्हणजे, नाल्याचे पाणी आणि सांडपाणी थेट उद्यानात मिसळत असल्याने नागरिकांना विविध रोगांचा प्रादुर्भाव होण्याची भीती आहे. उद्यानाची देखभाल करण्याची जबाबदारी असलेल्या महानगरपालिकेकडून याकडे जाणीवपूर्वक दुर्लक्ष केले जात असल्याचा आरोप नागरिकांनी केला आहे.

सामाजिक कार्यकर्ते आदित्य पाटील यांनी यावर प्रतिक्रिया देताना सांगितले, “माजी आमदार अनिल बेनके यांच्या नेतृत्वाखाली बुडा आणि महानगरपालिकेकडून शाहूनगरमध्ये उद्यान बांधकामाचे काम सुरू करण्यात आले होते. परंतु, पालिका आणि बुडा अधिकाऱ्यांच्या निष्काळजीपणामुळे शाहूनगरमधील हे उद्यान अजूनही पूर्ण झालेले नाही. हे काम तातडीने पूर्ण करण्यात यावे, अशी आमची मागणी आहे.”

या गंभीर समस्येवर तातडीने लक्ष देऊन उद्यानाचे काम पूर्ण करावे आणि त्याची योग्य देखभाल करावी, अशी मागणी स्थानिक नागरिक करत आहेत.