बेळगावात धोकादायक वडापाव सेंटरवरील झाड अखेर हटवले; मोठी दुर्घटना टळली बेळगाव: शहराच्या रविवार पेठेत असलेल्या नरगुंदकर भावे चौकातील शनी मंदिराकडे जाणाऱ्या रस्त्यालगत एका वडापाव सेंटरवर झुकलेले एक भलेमोठे झाड अखेर महानगरपालिका आणि विविध विभागांच्या संयुक्त प्रयत्नाने हटवण्यात आले.

सुमारे १०० वर्षांहून अधिक जुने असलेले हे झाड धोकादायक स्थितीत असल्याने नागरिकांमध्ये भीतीचे वातावरण होते. बेळगाव शहरातील रविवार पेठेत असलेल्या नरगुंदकर भावे चौकात, व्यंकटरमण मंदिरासमोर असलेले हे जुने पिंपळाचे झाड कधीही कोसळण्याची शक्यता होती. हे झाड सुनील बाळाजी पवार यांच्या मालकीच्या वडापाव सेंटरच्या भिंतीवर झुकले होते, त्यामुळे भिंतींना तडेही गेले होते. नगरसेवक जयतीर्थ सौंदत्ती यांनी या गंभीर परिस्थितीची दखल घेऊन तत्काळ महानगरपालिकेला आणि इतर संबंधित विभागांना कळवले.

यावर तातडीने कार्यवाही करत, सार्वजनिक बांधकाम विभाग, वन विभाग, पोलीस आणि वीज विभागाच्या सहकार्याने हे धोकादायक झाड कापून हटवण्यात आले. नगरसेवक सौंदत्ती यांनी सांगितले की, “हे झाड मोठ्या प्रमाणात झुकले होते आणि वडापाव सेंटरच्या भिंतींना तडे गेले होते, ज्यामुळे मोठी दुर्घटना होण्याची शक्यता होती.”

वडापाव सेंटरचे मालक सुनील बाळाजी पवार यांनीही या कार्यवाहीबद्दल समाधान व्यक्त केले. ते म्हणाले, “आमच्या सेंटरच्या भिंतीवर हे जुने झाड झुकले होते आणि ते कधीही कोसळू शकते अशी भीती होती. आम्ही नगरसेवकांच्या निदर्शनास ही बाब आणताच त्यांनी त्वरित कारवाई केली आणि झाड कापले.”

या कारवाईमुळे परिसरातील नागरिकांना मोठा दिलासा मिळाला असून, संभाव्य धोका टळला आहे.