राज्य सरकारच्या दोन वर्षांच्या कामगिरीवर बोलल्यास भाजपला काय अडचण आहे, असा सवाल मंत्री सतीश जारकीहोळी यांनी उपस्थित करत भाजपला त्यांच्या ११ वर्षांच्या कामाचा लेखाजोखा मांडण्याचे आव्हान दिले आहे.

आज माध्यमांशी बोलताना ते म्हणाले, डिसेंबर अजून खूप दूर आहे, तेव्हा बघू. मंत्रिमंडळ विस्तार हायकमांडने करायचा आहे. ज्येष्ठ आमदारांना मंत्री व्हायचं आहे, यावर त्यांची इच्छा आहे. ३० महिन्यांनंतर आम्हाला मंत्री व्हायचं आहे, असं अनेक आमदारांचं म्हणणं आहे. मंत्रिमंडळ विस्तार झाला तर चांगलं होईल, नवीन नेतृत्व तयार होईल. असं म्हणत त्यांनी अप्रत्यक्षपणे मंत्रिमंडळ विस्ताराला पाठिंबा दर्शवला.

दोन वर्षांच्या काँग्रेस सरकारच्या कामगिरीवर बोललो तर भाजपला काय त्रास? आम्ही त्यांच्या कामगिरीवर बोलत नाही, आमच्या कामगिरीवर बोलत आहोत. त्यांनीही त्यांची सभा घ्यावी, त्यांना कोणी नाही म्हटलं आहे का? आम्ही दोन वर्षांची कामगिरी सांगत आहोत, त्यांनी त्यांच्या ११ वर्षांची कामगिरी सांगावी. शेतकऱ्यांच्या समाधीवर काँग्रेस सभा घेत आहे, असा आर. अशोक यांचा आरोप आहे, ते नेहमीच असं बोलतात. भाजपच्या सरकारमध्येही अशा घटना घडल्या आहेत. आम्ही आमच्या कामगिरीवर बोलत आहोत, अपयशावर नाही, असं जारकीहोळी म्हणाले.

दोन वर्षांनंतर गॅरंटी योजना बंद होतील, या चर्चेवर भाजपवाले पहिल्या दिवसापासून गॅरंटी योजना बंद होतील, असं म्हणत आहेत. हे दोन वर्षांपासून सुरू आहे आणि अजून तीन वर्षे सुरू राहील. सरकार व्यवस्थित चालले आहे, भाजप खोटे बोलण्याचा प्रयत्न करत आहे, असंही जारकीहोळी म्हणाले.

भारतीय लष्करातील जवानांबद्दल इतर राज्यांतील भाजप नेत्यांच्या वादग्रस्त वक्तव्यावर, कोणी काय बोललं आहे, हे त्यांनाच विचारावं. आपण सर्वांनी देशाच्या सैनिकांवर विश्वास ठेवला पाहिजे. कोत्तूर मंजुनाथ यांचे वक्तव्य त्यांचे वैयक्तिक मत आहे, सरकारचे नाही. देशाच्या विषयावर आपण सर्वांनी एकत्र असले पाहिजे. आमच्या पक्षानेही तसा संदेश पाठवला आहे. आम्ही केंद्र सरकारसोबत आहोत, असं जारकीहोळी म्हणाले.

राज्यात मुख्यमंत्री बदलणार यावर तुम्ही बंगळूरुमध्येच विचारा, असंही जारकीहोळी म्हणाले.