बेळगावच्या शैक्षणिक क्षेत्रात अग्रगण्य स्थान मिळवलेल्या ऐतिहासिक सरकारी सरस्वती कन्या हायस्कूलचा १५० वा वर्धापनदिन, नवीन शाळेच्या इमारतीचे लोकार्पण आणि माजी विद्यार्थिनींचे स्नेहसंमेलन मोठ्या उत्साहात पार पडले.

बेळगावच्या शहापूर येथील सरकारी सरस्वती कन्या हायस्कूलमध्ये हा भव्य कार्यक्रम आयोजित करण्यात आला होता. प्रमुख अतिथी म्हणून सांगली संस्थानाच्या महाराणी रोहिणी पटवर्धन, आमदार अभय पाटील, मानद अध्यक्षा सुनीता हनमशेट, अध्यक्षा प्रीती कामत यांच्यासह अन्य मान्यवर उपस्थित होते. १५० वा वर्धापनदिन, नवीन इमारतीचे लोकार्पण आणि माजी विद्यार्थिनींच्या स्नेहसंमेलनाचे उद्घाटन व्हर्च्युअल माध्यमातून करण्यात आले.

यावेळी बोलताना आमदार अभय पाटील म्हणाले की, सरस्वती गर्ल्स हायस्कूल आणि पीयू कॉलेजसाठी भाजप सरकारच्या काळात साडेसहा कोटी रुपयांचा निधी देण्यात आला होता. आता कामा पूर्ण झाले असून, आज नवीन इमारतीचे लोकार्पण करण्यात आले आहे. शंभर वर्षांपूर्वी मुलींच्या शिक्षणासाठी सरस्वती हायस्कूल आणि मुलांच्या शिक्षणासाठी चिंतामणराव शाळा सुरू करणाऱ्या सांगली सरकारच्या योगदानाला त्यांनी कृतज्ञतापूर्वक स्मरण केले. बेळगाव शैक्षणिक क्षेत्रात अग्रेसर राहण्यात त्यांचे योगदान मोठे असल्याचे आमदार पाटील यांनी सांगितले.

कार्यक्रमात, सर्वात जुनी माजी विद्यार्थिनी, १९५७ च्या बॅचच्या सुशीला जोशी, ज्या आता रागिणी घाडगे म्हणून ओळखल्या जातात, त्यांनी आपले मनोगत व्यक्त केले. त्या म्हणाल्या की, वयोमानामुळे या कार्यक्रमाला येऊ नये असे मला वाटले होते. पण येथील प्रसन्न वातावरण पाहून मी न येऊन मोठी चूक केली असती, असे मला जाणवले.

बेळगाव दक्षिणचे आमदार अभय पाटील यांनी शतकांचा इतिहास असलेल्या शाळेला उन्नत करून नवीन रूप दिले आहे. आज शाळेत घरी सणासुदीसारखे सुंदर आणि खेळीमेळीचे वातावरण निर्माण झाले आहे, असे मत सध्याच्या आणि माजी विद्यार्थिनींनी व्यक्त केले. आमदार अभय पाटील यांचे आभार व्यक्त करत ‘आमची शाळा, आमचा अभिमान’ अशी भावना १९८२ च्या बॅचच्या विद्यार्थिनींनी व्यक्त केली आणि आनंद साजरा केला.

तर, सोलापूरहून आलेल्या २००३ च्या बॅचच्या ज्योती गाडे आणि अन्य माजी विद्यार्थिनींनी सांगितले की, अशा ऐतिहासिक शाळेच्या विद्यार्थिनी असल्याने आम्हाला खूप अभिमान वाटतो. आमदार अभय पाटील यांनी शाळेला केवळ उन्नत केले नाही, तर माजी विद्यार्थिनींच्या स्नेहसंमेलनालाही ते कारण ठरले, असे त्यांनी नमूद केले.

१९५० पासून २०२२ च्या बॅचपर्यंतच्या माजी विद्यार्थिनी आणि सध्याच्या विद्यार्थिनी या भव्य कार्यक्रमाचे साक्षीदार ठरल्या.