वनपरिमंडळाच्या वतीने विश्वेश्वरय्या नगर येथील कन्नड प्राथमिक शाळेत शनिवारी बेळगाव राज्य वनखात्याचा महत्त्वाचा प्रकल्प असलेल्या वृक्षारोपण सप्ताहाचा शुभारंभ करण्यात आला.सकाळी आठ वाजता शाळेच्या आवारात जमलेली अनेक शाळकरी मुले, शिक्षक, वनविभागाचे कर्मचारी, अधिकारी यांच्यासह स्थानिक आमदार राजू सेठ या कार्यक्रमात सहभागी झाले होते.
वनरक्षकांनी आमदार सेठ व महापालिका आयुक्त अशोक दुडगुंटी यांचे पुष्पगुच्छ देऊन स्वागत केले व त्यानंतर शाळेच्या प्रांगणात रोपटे लावून रोप सप्ताहाची सुरुवात करण्यात आली.

यावेळी प्रसारमाध्यमांशी बोलताना बेळगाव उत्तरचे आमदार राजू सेठ यांनी सांगितले की, राज्य सरकारने या वनमहोत्सव सप्ताहांतर्गत 1 कोटी, नंतर 5 आणि पुन्हा 25 कोटी रोपे लावण्याचे नियोजन केले असून, संपूर्ण राज्य हिरवेगार बनविण्याचे उद्दिष्ट आहे. वनक्षेत्र वाढले, तर आपले शहर पूर्णपणे हिरवेगार होईल आणि चांगला पाऊस पडून पाण्याची समस्याही दूर होईल, असे ते म्हणाले.
शहरातील जनता, वनविभागाचे अधिकारी आणि आपण या पर्यावरणाचे आणि झाडांचे महत्त्व जाणून आहोत, आधीच झाडे नष्ट झाली आहेत आणि पाऊस, पिके वेळेवर येत नाहीत, त्यामुळे आपण खूप जागरूक राहून असे कार्यक्रम यशस्वी करून संसाधने, आपल्या निसर्गाचे संरक्षण केले पाहिजे असे ते म्हणाले.

बेळगाव विभागाचे मुख्य वनसंरक्षक मंजुनाथ चौहान यांनी सांगितले की, वनविभागातर्फे १ ते ७ जुलै या कालावधीत वनमहोत्सव सप्ताह राबविण्यात येत असून, राज्यातील सर्व विभागांमध्ये कोट्यवधी रोपे देण्याचे नियोजन इतर विभागांच्या सहकार्याने करण्यात आले आहे. राज्यभरात ५ कोटी रोपे लावण्याचे उद्दिष्ट असल्याचे ते म्हणाले. सर्वांच्या सहकार्याने हा सप्ताह अत्यंत यशस्वी होईल, विकासाकडे लक्ष दिले पाहिजे, पर्यावरण आणि वनस्पतींचे रक्षण करण्याचे कामही केले पाहिजे, तरच सध्याच्या समस्यांपासून आपली सुटका होऊ शकेल, असे ते म्हणाले.
या विशेष कार्यक्रमास बेळगाव उत्तरचे आमदार, महानगरपालिकेचे आयुक्त, वनविभागाचे अधिकारी व कर्मचारी, शासकीय शाळेतील मुले व शिक्षक, हरित विकास संघटनेचे सदस्य व नागरिक मोठ्या संख्येने उपस्थित होते.