तुमकूरमध्ये मंत्री के. एन. राजण्णा यांच्या निवासस्थानी उपमुख्यमंत्री डॉ. जी. परमेश्वर यांनी महत्वपूर्ण बैठक घेतली. या भेटीनंतर प्रसारमाध्यमांशी बोलताना त्यांनी, जिल्ह्यातील सर्व नेते एकजूट असल्याचा संदेश देणे हाच या बैठकीचा मुख्य उद्देश असल्याचे स्पष्ट केले.

मंत्री के. एन. राजण्णा आणि आपले गेल्या ५० वर्षांपासूनचे संबंध असून आम्ही नेहमी एकत्र राजकारण केले आहे, असे डॉ. जी. परमेश्वर यांनी सांगितले. राजण्णा यांचे सहकार क्षेत्रातील योगदान मोठे असून त्यांना मंत्रिमंडळात स्थान देण्यासाठी प्रयत्न सुरू असल्याचे त्यांनी नमूद केले. मुख्यमंत्र्यांचा हा वैयक्तिक दौरा असल्याने आपण त्यांच्यासोबत गेलो नसल्याचेही त्यांनी स्पष्ट केले.

तुमकूरला मुख्यमंत्रीपद मिळण्याच्या अपेक्षेबाबत बोलताना, तो पक्षश्रेष्ठींचा निर्णय असून त्यांनी डी. के. शिवकुमार यांच्या नावाचा विचार केला आहे, असे डॉ. जी. परमेश्वर यांनी म्हटले. आपण सर्वजण मिळून जनतेला दिलेली आश्वासने पूर्ण करू, अशी प्रतिक्रिया डॉ. जी. परमेश्वर यांनी व्यक्त केली.

आपण राजकारणात कधीही असमाधानी नव्हतो आणि आजही पूर्णपणे समाधानी आहोत, अशा शब्दांत डॉ. जी. परमेश्वर यांनी नाराजीच्या चर्चा फेटाळल्या. काँग्रेसचे राष्ट्रीय अध्यक्ष मल्लिकार्जुन खर्गे यांच्यासह पक्षश्रेष्ठींनी चर्चा करूनच आपल्यावर महसूल मंत्रालयाची जबाबदारी सोपवली असल्याचे सांगत त्यांनी वादावर पडदा टाकला.