मंत्रिमंडळ पुनर्रचनेचा निर्णय पूर्णतः हायकमांडच्या हाती असून, मंत्रीपदासाठी इच्छुक असलेल्या आमदारांनी दिल्लीला भेट देण्यात काहीही चुकीचे नाही, असे स्पष्टीकरण मुख्यमंत्री सिद्धरामय्या यांनी दिले आहे.

चिकमंगळूरमधील एन. आर. पुरा विश्रामगृहात पत्रकारांशी बोलताना मुख्यमंत्री सिद्धरामय्या यांनी स्पष्ट केले की, मंत्रिमंडळ विस्तार हायकमांडच्या निर्णयावर अवलंबून असून निवडणुकांमुळे त्याला विलंब झाला आहे. नरसिंहराजपुरा येथील पुलाचे काम मार्गी लावल्याचा आनंद व्यक्त करतानाच, राजकीय सचिव नसीर अहमद यांनी अद्याप राजीनामा दिला नसल्याची माहिती मुख्यमंत्री सिद्धरामय्या यांनी दिली.

दावणगेरे दक्षिण पोटनिवडणुकीत पक्षांतर्गत काही विरोध असला तरी काँग्रेसचा विजय निश्चित असून, निवडणुकीतील निकालामुळे कोणाचेही पद जाणार नाही, असे मुख्यमंत्री सिद्धरामय्या यांनी स्पष्ट केले. याशिवाय, वनवासींना हक्क पत्रे देण्याबाबत लवकरच बैठक घेतली जाईल आणि पर्यटनासाठी कर्नाटक पूर्णपणे सुरक्षित असल्याचे मुख्यमंत्री सिद्धरामय्या यांनी ठामपणे सांगितले.