युद्धग्रस्त देशांमध्ये अडकलेल्या राज्यातील नागरिकांना सुरक्षितपणे मायदेशी परत आणण्याची प्रक्रिया आता वेगवान झाली आहे, अशी माहिती गृहमंत्री जी. परमेश्वर यांनी दिली आहे.

बेंगळुरू येथे प्रसारमाध्यमांशी संवाद साधताना त्यांनी या परिस्थितीचा आढावा घेतला. युद्धजन्य परिस्थिती असलेल्या देशांतून आतापर्यंत दोन विमानांद्वारे मोठ्या संख्येने लोक राज्यात परतले आहेत. या गंभीर विषयावर मुख्यमंत्री सिद्धरामय्या यांनी केंद्र सरकारचे लक्ष वेधले असून ते सातत्याने संपर्कात आहेत. “संयुक्त अरब अमिरातीमध्ये सुमारे १० दशलक्ष भारतीय आहेत. तिथे पर्यटनासाठी किंवा नोकरीनिमित्त गेलेल्या आपल्या नागरिकांना सुरक्षितपणे परत आणण्यासाठी भारतीय दूतावास अहोरात्र कष्ट घेत आहेत,” असा विश्वास जी. परमेश्वर यांनी व्यक्त केला.

दरम्यान, उपमुख्यमंत्री डी.के. शिवकुमार यांनी आयोजित केलेल्या स्नेहभोजनाबाबत विचारले असता त्यांनी सकारात्मक भूमिका मांडली. “लोकशाही व्यवस्थेत मुख्यमंत्री किंवा नेत्यांनी स्नेहभोजनाचे आयोजन करणे ही काही नवीन गोष्ट नाही. तब्बल सहा वर्षे केपीसीसीचे नेतृत्व करणे ही साधी बाब नाही. त्याच आनंदाप्रीत्यर्थ डी.के. शिवकुमार यांनी सर्वांना आमंत्रित केले आहे,” असे जी. परमेश्वर यांनी म्हटले. हे स्नेहभोजन पक्षाच्या नेत्यांमध्ये संयम आणि एकजूट निर्माण करण्यासाठी उपयुक्त ठरेल, तसेच पक्षात नवे नेतृत्व घडवणे हा काँग्रेसचा मूळ उद्देश असल्याचे जी. परमेश्वर यांनी स्पष्ट केले.