कर्नाटकचे पहिले लोकनियुक्त मुख्यमंत्री आणि विधानसौधचे निर्माते केंगल हनुमंतय्या यांच्या जयंतीनिमित्त मुख्यमंत्री सिद्धरामय्या यांनी पुष्पहार अर्पण करून अभिवादन केले. यावेळी त्यांनी राजकारणात सध्या सुरू असलेल्या सत्तावाटपाच्या चर्चा आणि डी. के. शिवकुमार यांच्या अनुपस्थितीवरही भाष्य केले.

केंगल हनुमंतय्या हे एक प्रामाणिक आणि खंबीर राजकारणी होते, ज्यांनी राज्याला विधानसौधसारखी सुंदर वास्तू दिली, असे मुख्यमंत्री सिद्धरामय्या यांनी म्हटले. कर्नाटकच्या एकीकरणासाठी आणि देशासाठी त्यांनी दिलेले योगदान कधीही विसरता येणार नाही. केंद्रात रेल्वे मंत्री म्हणून त्यांनी सेवा बजावली आणि संविधान निर्मिती प्रक्रियेतही महत्त्वाच्या सूचना केल्या होत्या. मात्र, ज्या विधानसौधसाठी त्यांनी प्रचंड कष्ट घेतले, त्याचे उद्घाटन त्यांना मुख्यमंत्री म्हणून करता आले नाही, ही खेदाची बाब असल्याचे मुख्यमंत्री सिद्धरामय्या यांनी नमूद केले.

बजेट अधिवेशनापूर्वीच्या बैठकीला उपमुख्यमंत्री डी. के. शिवकुमार अनुपस्थित राहिल्याबद्दल विचारले असता, त्यांना आसाम विधानसभा निवडणुकीच्या कामासाठी दिल्लीला जावे लागले असून तसे पत्र त्यांनी दिले असल्याचे मुख्यमंत्र्यांनी स्पष्ट केले. सत्तावाटपाबाबत बोलताना आम्ही हायकमांडच्या निर्णयाला बांधील आहोत आणि हायकमांडने दिल्लीला बोलावल्यास नक्कीच जाऊ, असे सिद्धरामय्या यांनी सांगितले. बदली प्रक्रियेत यतींद्र सिद्धरामय्या यांचा हस्तक्षेप असल्याच्या प्रताप सिंह यांच्या आरोपाचा समाचार घेताना, त्यांना साधे तिकीटही मिळालेले नाही, असा टोला लगावत मुख्यमंत्री पुढे निघून गेले.