दिव्यांगांनी स्वावलंबी जीवन जगावे, या उद्देशाने त्यांना मोफत गॅस शेगड्यांचे वाटप करण्यात आले आहे, असे मत ब्लॉक काँग्रेस अध्यक्ष आणि ग्रामपंचायतीचे ज्येष्ठ सदस्य अनिल पाटील यांनी व्यक्त केले.

चिकोडी तालुक्यातील चंदूर ग्रामपंचायत हद्दीतील ५६ हून अधिक दिव्यांगांना गॅस शेगड्यांचे वाटप केल्यानंतर ते बोलत होते. २०१५ च्या पंचवार्षिक आर्थिक योजनेअंतर्गत या गॅस शेगड्यांचे वाटप करण्यात आले आहे. “दिव्यांगांनी या गॅस शेगड्यांचा योग्य वापर करून एक आदर्श जीवन जगावे,” अशी सदिच्छा त्यांनी व्यक्त केली.

त्यानंतर ग्रामीण दिव्यांग पुनर्वसन कार्यकर्ते अनिल हिरेकोडी यांनी आपले मत मांडले. “दिव्यांगांच्या समस्या जाणून घेऊन आज चंदूर ग्रामपंचायत मदतीचा हात पुढे करत आहे, ही अभिमानास्पद गोष्ट आहे. आज सुमारे ५६ हून अधिक दिव्यांगांना मोफत गॅस शेगड्यांचे वाटप करण्यात आले आहे. याबद्दल मी चंदूर ग्रामपंचायतीचे आभार मानतो,” अशी कृतज्ञता त्यांनी व्यक्त केली.

यावेळी ग्रामपंचायत अध्यक्ष सविता शरद पाटील, उपाध्यक्ष चेतन अशोक कांबळे, संतोष कुंभार, चंद्रकांत कृष्णा पाटील, कृष्णनाथ पाटील, वैशाली पाटील, चंद्रकांत पाटील, प्राजक्ता पाटील, पूजा मारुती कांबळे, आकाशी कृष्णा कांबळे, शरत पाटील, मारुती कांबळे, संतोष कुंभार, अशोक जमदाडे, मल्लप्पा धनगर, पीडीओ सदाशिव कारीगार यांच्यासह ग्रामपंचायत कर्मचारी वर्ग उपस्थित होता.