कागवाड येथील शेडबाळ येथे मुंबईतील प्रसिद्ध हिरे व्यापारी सुदर्शन डोटिया यांनी आपली कोट्यवधींची संपत्ती आणि ऐहिक जीवनाचा त्याग करून मुनिदीक्षा स्वीकारली. शेडबाळ येथील आचार्य शांतीसागर जैन आश्रमात आचार्य धर्मसेन मुनी महाराज यांच्या हस्ते त्यांना ही दीक्षा देण्यात आली. दीक्षेमुळे त्यांचे ‘सर्वार्थसेन मुनी महाराज’ असे नामकरण करण्यात आले. हा मुनिदीक्षेचा कार्यक्रम सोमवारी आचार्य शांतीसागर जैन आश्रमात मुनी महाराजांच्या उपस्थितीत विधिवत पार पडला.

यावेळी आचार्य धर्मसेन मुनी महाराजांनी सांगितले, “सुदर्शन डोटिया यांनी आपले जीवन मुनी आणि धर्माच्या सेवेसाठी समर्पित केले आहे. त्यांना आचार्य शांतीसागर मुनी महाराजांची सेवा करण्याची संधी मिळाली. त्यानंतर आचार्य सुबलसागर मुनी महाराजांच्या नेतृत्वाखाली त्यांनी अनेक मुनींची सेवा केली. १२ वर्षांपूर्वी त्यांनी ‘नियमा सल्लेखना व्रत’ स्वीकारले होते, जे या डिसेंबर महिन्यात पूर्ण होणार आहे. आता त्यांनी मुनिदीक्षा घेतल्यामुळे ते सर्व प्रकारचे अन्न त्याग करणार आहेत. कोट्यवधींचे मालक असूनही त्यांनी मोक्षमार्गासाठी सर्व संपत्तीचा त्याग केला आहे.”

“आजच्या विज्ञान युगात संपत्ती आणि ऐश्वर्य माणसाचे रक्षण करू शकत नाही, हे त्यांनी जाणले आणि म्हणूनच त्यांनी हा त्याग केला,” असेही ते म्हणाले.

यावेळी प्रतिष्ठाचार्य आनंद उपाध्ये म्हणाले, “जैन धर्माची तत्त्वे, म्हणजे सम्यक ज्ञान आणि सम्यक चारित्र्य, ज्यांनी आत्मसात केली आहेत, अशा धर्मनिष्ठ व्यक्तींना कळते की, कितीही श्रीमंती, चक्रवर्ती पद किंवा मोठेपण असले तरी ऐहिक जीवनात सुख नाही. हे सत्य समजल्यामुळेच उद्योगपती सुदर्शन डोटिया यांनी सर्व संपत्तीचा त्याग करून मोक्षमार्ग स्वीकारला आहे. आपल्या कुटुंबाचा आणि संपत्तीचा त्याग करून त्यांनी मुनिदीक्षा घेतली आहे.”

“त्यांचा हा निर्णय जैन समाजासाठी एक मोठा संदेश आहे. भगवान महावीरांनी ‘जगा आणि जगू द्या’ असा संदेश दिला आहे. केवळ संपत्तीसाठी भांडणे करण्यापेक्षा जीवनात धर्मासाठी त्याग करा,” असेही त्यांनी सांगितले.

या मुनिदीक्षेच्या कार्यक्रमासाठी आचार्य धर्मसेन, आचार्य शांतीसेन मुनी महाराज, आश्रमाचे व्यवस्थापक राजू नांद्रे, प्रतिष्ठाचार्य आनंद उपाध्ये, बाहुबली उपाध्ये, भरत उपाध्ये, कुमार अलगौडर, निखिल उपाध्ये, सुदर्शन डोटिया यांचे कुटुंबीय संजय जैन, संदीप जैन, संजू कोटाडिया, पत्नी मंजुळा, मुली मोतिया, नमिता, वंदना, प्रिया आणि इतर श्रावक उपस्थित होते. त्यांना मिरवणुकीने दीक्षा स्थळी आणण्यात आले आणि विधीपूर्वक दीक्षा देण्यात आली.

या कार्यक्रमात शेडबाळ येथील जैन समाजातील ज्येष्ठ नागरिक किरण यदंगौडर, शितल देसाई, अजित नरसगौडर, नेमीनाथ नरसगौडर, प्रकाश यदंगौडर, प्रकाश चौगुले, भरत नांद्रे यांच्यासह अनेक मान्यवर उपस्थित होते.