खानापूर येथील रहिवासी आणि सूर्य सॉमिलचे मालक, ६५ वर्षीय मारवाडी समाजाचे नागरिक दयालाल कर्षण पटेल यांचा मृतदेह मलप्रभा नदीकिनारी आढळून आला आहे. ते ८ जुलै, मंगळवारपासून बेपत्ता होते.

त्यांच्या नातेवाईकांनी त्यांचा सर्वत्र शोध घेण्याचा प्रयत्न केला. मंगळवारी संध्याकाळी मलप्रभा नदी घाटावर त्यांच्या चप्पल सापडल्याने संशय वाढला आणि मलप्रभा नदीच्या पाणलोट क्षेत्रातही त्यांचा शोध सुरू होता. अखेर, शुक्रवारी दुपारी १२:०० वाजण्याच्या सुमारास खानापूरच्या अग्निशमन दलाच्या कर्मचाऱ्यांनी शोधमोहीम राबवली असता, त्यांचा मृतदेह बांबूच्या झुडपाखाली अडकलेल्या अवस्थेत आढळला.

बेळगाव-गोवा महामार्गावरील कुप्पटगिरीजवळ पुलापासून थोड्या अंतरावर खानापूरच्या अग्निशमन दलाच्या कर्मचाऱ्यांनी नदीतून त्यांचा मृतदेह बाहेर काढला.

याबाबत खानापूर पोलिसांना माहिती देण्यात आली आहे. पोलिस घटनास्थळी दाखल झाल्यानंतर पंचनामा करून मृतदेह शवविच्छेदनासाठी खानापूरच्या सार्वजनिक रुग्णालयात पाठवण्यात येईल, असे सांगण्यात आले आहे. शवविच्छेदनानंतर मृतदेह नातेवाईकांच्या ताब्यात देण्यात येणार आहे. दयालाल पटेल हे आरोग्य समस्यांनी त्रस्त होते आणि त्यामुळे मानसिक तणावाखाली त्यांनी हे टोकाचे पाऊल उचलले असावे, अशी माहिती त्यांच्या कुटुंबीयांनी खानापूर पोलिस ठाण्यात दिली आहे.