राम आणि गांधी टोपी ही कोणा एकाची मक्तेदारी नसून ती देशातील प्रत्येकाचे सौभाग्य आहे, असे प्रतिपादन श्री क्षेत्र धर्मस्थळ ग्रामविकास योजनेच्या वतीने आयोजित गांधी जयंती व व्यसनमुक्ती कार्यक्रमात माजी मंत्री लक्ष्मी हेब्बाळकर यांनी केले.

श्री क्षेत्र धर्मस्थळ ग्रामविकास योजना बी.सी. ट्रस्ट, अखिल कर्नाटक जिल्हा जनजागृती मंच ट्रस्ट, प्रगती बंधू, स्वयंसाहाय्यता संघ महासंघ बेळगाव जिल्हा आणि नवजीवन समितीच्या संयुक्त विद्यमाने बेळगाव तालुक्यातील हलगा येथील सुवर्ण गार्डन सभागृहात जिल्हास्तरीय जनजागृती रॅली, गांधी स्मृती व व्यसनमुक्त झालेल्यांचा सत्कार सोहळा पार पडला.

कार्यक्रमाचे उद्घाटन करताना माजी मंत्री लक्ष्मी हेब्बाळकर म्हणाल्या की, महात्मा गांधी यांनी सत्याच्या आणि अहिंसेच्या मार्गाने देशाला स्वातंत्र्य मिळवून दिले. गांधीजींचे आदर्श केवळ पुस्तकांपुरते मर्यादित न ठेवता ते दैनंदिन जीवनात अंगीकारले पाहिजेत. पुढे बोलताना त्यांनी सांगितले की, राम ही कोणाचीही खाजगी मालमत्ता नसून राम आणि गांधी टोपी हा देशातील प्रत्येक नागरिकाचा आणि काँग्रेस पक्षाचा सन्मान आहे.

यावेळी व्यसनमुक्तीचे महत्त्व पटवून देताना त्यांनी सांगितले की, व्यसनांमुळे मुलांचे शिक्षण, आरोग्य आणि कौटुंबिक सुखावर गंभीर परिणाम होतो. तरुण पिढीने व्यसनांपासून दूर राहून समाजात चांगल्या सवयी आत्मसात केल्या पाहिजेत. व्यसनातून बाहेर पडण्यासाठी दृढनिश्चय आणि कुटुंबाची साथ आवश्यक असल्याचे सांगत त्यांनी व्यसनमुक्त झालेल्या नागरिकांचे अभिनंदन केले.

या सोहळ्याला पूज्य श्री अडवेश्वर स्वामीजींची उपस्थिती लाभली होती. कार्यक्रमाच्या अध्यक्षस्थानी डॉ. जी. आर. सोनेर होते. राज्य संघटक नटराज बादामी यांनी व्यसनमुक्त झालेल्यांचा सत्कार केला. प्रादेशिक संचालिका दयापीला, डॉ. श्रीकांत बी. एन. यांच्यासह अनेक मान्यवर व संघाचे पदाधिकारी उपस्थित होते.