मुरुगोड येथील सरकारी जागेवर बेकायदा खाणकामासाठी हजारो झाडांची तोड करण्यात आल्याची घटना समोर आली आहे. याप्रकरणी विरोधी पक्षनेत्यांनी घटनास्थळाची पाहणी करून निष्क्रीय प्रशासनाविरोधात आक्रमक भूमिका घेतली आहे.

मुरुगोड येथील सरकारी जमिनीवर अवैध खाणकामाच्या नावाखाली मोठ्या प्रमाणावर वृक्षतोड झाल्याचे उघडकीस आले आहे. या गंभीर प्रकारानंतर विरोधी पक्षांच्या नेत्यांनी थेट घटनास्थळी भेट देऊन पाहणी केली असून मौन बाळगणाऱ्या जिल्हा प्रशासनाविरोधात कारवाईची मागणी केली आहे.

बैलहोंगल तालुक्यातील मुरुगोड गावात सरकारी जमिनीवरील हजारो झाडे तोडण्यात आल्याचा आरोप होत आहे. या पार्श्वभूमीवर माजी आमदार डॉ. विश्वनाथ पाटील, जेडीएस जिल्हाध्यक्ष शंकर माडलगी आणि नेते गुरु मेटगुड यांच्या शिष्टमंडळाने परिसराची पाहणी केली. गेल्या दोन वर्षांपासून येथे बेकायदा खाणकाम सुरू असून लाखो रुपयांच्या नैसर्गिक संपत्तीचा नाश होत आहे, असे डॉ. विश्वनाथ पाटील यांनी म्हटले.

या बेकायदा प्रकाराबाबत स्थानिक नागरिक आणि शेतकऱ्यांनी प्रशासनाकडे अनेकदा तक्रारी करूनही कोणतीही कारवाई झालेली नाही, अशी प्रतिक्रिया शंकर माडलगी यांनी दिली. पर्यावरण हानी पोहोचवणाऱ्या आणि बेकायदा खाणकामाला खतपाणी घालणाऱ्यांवर कठोर कायदेशीर कारवाई करावी, अन्यथा तीव्र आंदोलन छेडले जाईल असा इशारा गुरु मेटगुड यांनी दिला.