कारगिल विजयोत्सवाच्या २७ व्या वर्षाच्या निमित्ताने बेळगाव जिल्हा माजी सैनिक संघटनांच्या महासंघातर्फे २५ आणि २६ जुलै रोजी विविध कार्यक्रमांचे आयोजन करण्यात आले आहे.

पत्रकार परिषदेत माहिती देताना महासंघाचे अध्यक्ष जगदीश पुजारी यांनी सांगितले की, कारगिल युद्धात वीरमरण आलेल्या सैनिकांचे स्मरण करणे, सैनिकांना आत्मबळ देणे आणि तरुणांमध्ये देशभक्ती जागृत करणे हा या कार्यक्रमाचा मुख्य उद्देश आहे.

२५ जुलै रोजी बसवेश्वर सर्कल ते धर्मनाथ भवन यादरम्यान बाईक रॅलीचे आयोजन करण्यात आले असून यामध्ये माजी सैनिक, युवक आणि नागरिक मोठ्या संख्येने सहभागी होणार आहेत.

२६ जुलै रोजी धर्मनाथ भवन येथे मुख्य कार्यक्रम होणार आहे. यामध्ये कारगिल युद्धातील हुतात्म्यांना श्रद्धांजली वाहिली जाईल. तसेच हुतात्मा सैनिकांच्या कुटुंबांचा सत्कार, ‘बेळगाव सैनिक रत्न’ पुरस्कार प्रदान आणि उत्कृष्ट शिक्षक, डॉक्टर व प्रगतीशील शेतकऱ्यांचा सन्मान केला जाईल, असे जगदीश पुजारी यांनी सांगितले.

या कार्यक्रमाला प्रमुख पाहुणे म्हणून कर्नाटकचे राज्यपाल थावरचंद गेहलोत, खासदार जगदीश शेट्टर आणि खासदार प्रियंका जरकीहोळी उपस्थित राहणार आहेत.

सार्वजनिक बांधकाम मंत्री सतीश जरकीहोळी, माजी मंत्री लक्ष्मी हेब्बाळकर आणि खासदार ईरन्ना कडाडी यांच्या हस्ते या कार्यक्रमाचे उद्घाटन होणार आहे.

ग्रीन आर्मीचे राज्य गौरव अध्यक्ष शशिकांत गुरुजी, चुनप्पा पुजारी, आमदार अभय पाटील, आमदार आसिफ सेठ, जिल्हाधिकारी मोहम्मद रोशन, जिल्हा पंचायत मुख्य कार्यकारी अधिकारी राहुल शिंदे, पोलीस आयुक्त भूषण बोरसे आणि पोलीस अधीक्षक के. रामराजन यांच्यासह अनेक मान्यवर या सोहळ्याला उपस्थित राहणार आहेत, असे जगदीश पुजारी यांनी सांगितले.

या प्रसंगी दहावी आणि बारावीमध्ये ९५ टक्क्यांपेक्षा जास्त गुण मिळवलेल्या माजी सैनिकांच्या पाल्यांचा सत्कार करून त्यांना पुस्तकांचे वाटप करण्यात येईल. तसेच प्रगतीशील शेतकरी आणि वीरनारींचा गौरव करण्यासोबतच १९६५ व १९७१ च्या भारत-पाकिस्तान युद्धात सहभागी झालेल्या ज्येष्ठ माजी सैनिकांचाही विशेष सत्कार केला जाईल, असे जगदीश पुजारी यांनी स्पष्ट केले.

कारगिल विजयोत्सवाच्या निमित्ताने आयोजित सर्व कार्यक्रमांमध्ये नागरिकांनी मोठ्या संख्येने उपस्थित राहून सैनिकांना आदरंजली अर्पण करावी, असे आवाहन महासंघातर्फे करण्यात आले आहे.

पत्रकार परिषदेला महासंघाचे गौरव अध्यक्ष रमेश बौगले, मडीवाळप्पा कलभावी, अशोक मजगी, चंद्रशेखर सावदी आणि कविता मिश्रा यांच्यासह अनेक माजी सैनिक उपस्थित होते.