महिला आणि बालविकास मंत्री लक्ष्मी हेब्बाळकर यांनी डॉ. बाबासाहेब आंबेडकर यांच्या विचारांचा गौरव केला आहे. महिलांचे सक्षमीकरण आणि सर्वांना दर्जेदार जीवन मिळवून देणे हेच बाबासाहेबांचे स्वप्न होते, असे प्रतिपादन त्यांनी केले आहे.

बेळगाव मधील बेळवट्टी गावामध्ये महामानव डॉ. बी.आर. आंबेडकर यांच्या नूतन पुतळ्याचे अनावरण मंत्री लक्ष्मी हेब्बाळकर यांच्या हस्ते पार पडले. हा पुतळा केवळ स्मारक नसून ती एक प्रेरणा असल्याचे त्यांनी यावेळी नमूद केले.

बाबासाहेबांनी जगातील सर्वश्रेष्ठ संविधान देऊन सर्व जाती-धर्माच्या लोकांना समान हक्क दिले आहेत. लोकशाहीची ‘भगवद्गीता’ असलेल्या संविधानामुळेच आज महिलांना राजकारणात संधी मिळत आहे, असे लक्ष्मी हेब्बाळकर यांनी म्हटले.

अत्यंत प्रतिकूल परिस्थितीत बाबासाहेबांनी मिळवलेले शिक्षण आणि त्यांचे कार्य सर्वांसाठी आदर्श आहे. ‘शिका, संघटित व्हा आणि संघर्ष करा’ हा मंत्र जीवन जगण्याचा मार्ग असल्याचे लक्ष्मी हेब्बाळकर यांनी सांगितले.

बेळगाव ग्रामीण मतदारसंघात विकासासोबतच सामाजिक न्याय प्रस्थापित करण्यासाठी आपण कटिबद्ध आहोत. मुलांचे शिक्षण आणि तरुणांचे भविष्य घडवणे हीच बाबासाहेबांना खरी श्रद्धांजली ठरेल, अशी भावना लक्ष्मी हेब्बाळकर यांनी व्यक्त केली.

या सोहळ्याला युवराज कदम, बाळू देसूरकर, मल्लेष चौगुले, मनोहर बेळगावकर, महेश कोलकार, वाय.पी. नाईक, डी.एन. देसाई, नारायण नलवडे, मधु नलवडे, संतोष कांबळे, दस्तगीर मलीकार, सुधाकर बौद्ध, जयवंत बाळेकुंद्री, मधुकर जाधव, बी.बी. देसाई, भुजंग गाडेकर, रेखा नाईक, गौतम पाटील, सातेरी चौगुले यांसह अनेक मान्यवर उपस्थित होते.