​विजापूर जिल्ह्यामध्ये पुन्हा एकदा भूकंपाचे धक्के जाणवल्याने नागरिकांमध्ये घबराट पसरली आहे. गेल्या काही दिवसांपासून सातत्याने होणाऱ्या या भूकंपाच्या सत्रामुळे जिल्हावासीय धास्तावले असून आज सकाळी पुन्हा एकदा जमिनीला हादरे बसले.

​आज सकाळी ठीक ८:२१ वाजता अचानक भूकंपाचे धक्के जाणवले. यामुळे भीतीग्रस्त झालेले नागरिक तातडीने घराबाहेर मोकळ्या जागेत आले. तिकोटी, कल्लाकवटगी, बाबा नगर, बिज्जरगी, सोमदेवरहट्टी, हबनूर आणि टक्कळकी यांसह अनेक गावांमध्ये भूकंपाचा अनुभव आला आहे. यासोबतच महाराष्ट्र सीमावर्ती भागातील मोरबगी आणि तिकुंडी या गावांमध्येही जमीन हादरल्याची माहिती समोर आली आहे.

​विजापूर जिल्ह्यामध्ये गेल्या काही दिवसांपासून वारंवार भूकंपाचे धक्के जाणवत असल्याने लोकांच्या चिंतेत भर पडली आहे. मात्र, या भूकंपाची नेमकी तीव्रता आणि केंद्रबिंदू याबाबत अद्याप कोणतीही अधिकृत माहिती प्राप्त झालेली नाही. याबाबत जिल्हा प्रशासनाकडून अधिकृत माहिती मिळण्याची प्रतीक्षा आहे.