​विजापूरमधील डोणी नदीचा गाळ काढण्याचे काम निकृष्ट दर्जाचे होत असल्याचा आरोप शेतकऱ्यांनी केला आहे. दरवर्षी पुराचा फटका बसणाऱ्या शेतकऱ्यांच्या मागणीनंतर हे काम सुरू झाले, मात्र आता ठेकेदाराच्या कार्यपद्धतीवर प्रश्नचिन्ह उपस्थित होत आहे.

विजापूर जिल्ह्यातील डोणी नदीत साचलेल्या गाळामुळे दरवर्षी पूरस्थिती निर्माण होते. हा गाळ काढण्यासाठी शेतकऱ्यांनी बबलेश्वर तालुक्यातील सारवाडपासून जिल्हाधिकारी कार्यालयापर्यंत अनेकवेळा आंदोलने केली आहेत. अखेर प्रशासनाने या कामाला सुरुवात केली असली तरी, कामाच्या दर्जाबाबत आता गंभीर प्रश्न उपस्थित केले जात आहेत.

याबाबत बोलताना, नदीतील गाळ काढण्याचे काम अतिशय निकृष्ट दर्जाचे सुरू असून नियमांचे पालन केले जात नाही, असे मल्लिकार्जुन बटगी यांनी म्हटले आहे. डोणी नदीतील गाळ काढण्यासाठी १० कोटी रुपयांचा निधी मंजूर करण्यात आला असून हे काम सारवाड आणि होनगणहळ्ळी परिसरात सुरू आहे. नियमानुसार नदीचे पात्र ३५० फूट रुंद आणि १० फूट खोल करणे आवश्यक होते. मात्र, प्रत्यक्षात केवळ ३०० फूट रुंदीकरण आणि पाच-सहा फूट खोलीपर्यंतच गाळ काढला जात आहे.
नदीचा गाळ पूर्णपणे काढला नाही तर पावसाळ्यात पुन्हा पाणी शेतात घुसून सुपीक जमीन वाहून जाण्याची भीती आहे.
केवळ नावापुरते काम करून निधी लाटण्याचा हा प्रकार सुरू असल्याची प्रतिक्रिया अरविंद कुलकर्णी यांनी दिली आहे.

शेतकऱ्यांच्या दीर्घकालीन मागणीनंतर सुरू झालेले हे काम आता वादाच्या भोवऱ्यात सापडले आहे. संबंधित अधिकारी आणि लोकप्रतिनिधींनी याकडे तातडीने लक्ष देऊन दर्जेदार काम करून घेणे गरजेचे आहे. अन्यथा, आगामी पावसाळ्यात डोणी नदीकाठच्या शेतकऱ्यांच्या समस्या पुन्हा एकदा उग्र रूप धारण करण्याची शक्यता आहे.