सहकारी संस्थांनी केवळ आर्थिक व्यवहारांपुरते मर्यादित न राहता सामाजिक क्षेत्रातही कार्य करणे गरजेचे आहे, असे प्रतिपादन ज्येष्ठ विधिज्ञ आणि हुल्लोळी अरिहंत सहकारी संस्थेचे संचालक पी. आर. चौगला यांनी केले आहे. हुक्केरी तालुक्यातील हुल्लोळी येथे आयोजित विद्यार्थ्यांच्या विशेष शिबिर प्रसंगी ते बोलत होते.

हुक्केरी तालुक्यातील हुल्लोळी सहकारी संस्था सामाजिक आणि शैक्षणिक सेवा बजावत आहे. संस्थेच्या माध्यमातून गरीब विद्यार्थ्यांना शिक्षणासोबतच विशेष शिबिरांचे आयोजन करून समाजात एक आदर्श निर्माण केला आहे. त्यामुळेच सहकारी संस्थांनी नेहमी समाजभिमुख कार्य करावे, असे पी. आर. चौगला यांनी म्हटले.

याबाबत माध्यमांशी बोलताना संस्थेचे अध्यक्ष भरमप्पा चौगला यांनी मोलाची माहिती दिली. सहकारी संस्था प्रगतीपथावर नेण्यासाठी ग्राहक आणि कर्मचाऱ्यांच्या परिश्रमासोबतच प्रसारमाध्यमांचे योग्य मार्गदर्शन आणि सूचनाही आवश्यक आहेत, असे भरमप्पा चौगला यांनी सांगितले.

संस्थेचे संचालक रवींद्र चौगला यांनी कामकाजाबाबत आपली भूमिका मांडली. संचालक मंडळाच्या बैठकीत कर्जाची सत्यता पूर्णपणे पारखूनच मंजुरी दिली पाहिजे. केवळ एकतर्फी निर्णय घेणे संस्थेच्या भविष्यासाठी धोक्याचे ठरू शकते, असे रवींद्र चौगला यांनी नमूद केले.

या कार्यक्रमाला उपाध्यक्ष बाहुबली नागनूरी, संचालक मंडळाचे सदस्य रामप्पा गोटूरी, जिन्नप्पा सप्तसागर, अशोक चौगला, प्रकाश चौगला, मायाप्पा होळेप्पगोळ, बसवराज पाटील, बाळप्पा संकेश्वरी, अरुण चौगला आणि सरचिटणीस आनंद चौगला उपस्थित होते.