बेळगाव जिल्ह्यातील बैलहोंगल तालुक्यातील तिगडी गावात श्री मारुती यात्रा महोत्सव मोठ्या उत्साहात आणि थाटामाटात साजरा झाला. दोन दिवस चाललेल्या या धार्मिक सोहळ्यात हजारो भाविकांनी उपस्थित राहून श्री मारुतीचे दर्शन घेतले.

तिगडी गावाचे ग्रामदैवत असलेल्या श्री मारुती देवाचा यात्रा महोत्सव दरवर्षीप्रमाणे यंदाही अत्यंत विधीवत पार पडला. उत्सवाच्या पहिल्या दिवशी मंदिरात श्री मारुती मूर्तीला विशेष अभिषेक आणि रुद्राभिषेक करण्यात आला. सकाळपासूनच दर्शनासाठी भाविकांची मोठी गर्दी झाली होती, तर दुपारी आयोजित महाप्रसादाचा लाभ शेकडो भाविकांनी घेतला. या धार्मिक विधींमुळे संपूर्ण गावात भक्तिमय वातावरण निर्माण झाले होते.

यात्रोत्सवाच्या दुसऱ्या दिवशी काढण्यात आलेला श्री मारुतीचा रथोत्सव मुख्य आकर्षण ठरले. ढोल-ताशांच्या आणि वाद्यांच्या गजरात गावातील प्रमुख मार्गांवरून हा रथोत्सव दिमाखात निघाला. गावातील महिलांनी रथाचे पूजन करून मनोभावे प्रार्थना केली. केवळ तिगडीच नव्हे, तर परिसरातील हजारो भाविकांनी रथ ओढण्यासाठी आणि दर्शनासाठी गर्दी केली होती.