केएलई संस्थेच्या वेणुध्वनी ९०.४ एफएम रेडिओ केंद्रातर्फे आंतरराष्ट्रीय महिला दिनाचे औचित्य साधून विशेष कार्यक्रमाचे आयोजन करण्यात आले होते. ‘स्त्रीध्वनी’ उपक्रमांतर्गत विविध क्षेत्रांत उल्लेखनिय कार्य करणाऱ्या महिलांचा या वेळी गौरव करण्यात आला.

बेळगाव विभागाच्या प्रादेशिक आयुक्त जानकी के. एम. या कार्यक्रमाला मुख्य अतिथी म्हणून उपस्थित होत्या. केएलई वेणुध्वनी रेडिओ केंद्राने ‘स्त्रीध्वनी’ कार्यक्रमाद्वारे विविध क्षेत्रांत यश संपादन करणाऱ्या महिलांची ओळख समाजाला करून दिली, ही बाब अत्यंत कौतुकास्पद असल्याचे जानकी के. एम. यांनी सांगितले.

केएलई विद्यापीठाच्या संशोधन संचालिका डॉ. सुचेता कुरुंदकर यांनी आपले विचार मांडताना स्पष्ट केले की, आज स्त्री आणि पुरुष असा कोणताही भेदभाव उरलेला नाही. प्रत्येक क्षेत्रात महिला आज आघाडीवर असून आपली मोहोर उमटवत आहेत, असे डॉ. सुचेता कुरुंदकर यांनी म्हटले.

कार्यक्रमाचे अध्यक्षस्थान केएलई विद्यापीठाचे कुलसचिव डॉ. व्ही. एम. पट्टणशेट्टी यांनी भूषवले. महिला या समाजाचा आधारस्तंभ आहेत. शिक्षण, आर्थिक स्वावलंबन आणि आत्मविश्वास या गोष्टींमुळेच महिला खऱ्या अर्थाने शक्तिशाली बनतात, असे डॉ. व्ही. एम. पट्टणशेट्टी यांनी नमूद केले.

या प्रसंगी वेणुध्वनी केंद्राचे केंद्र संचालक डॉ. वीरेशकुमार नंदगाव, कार्यक्रम समन्वयक मंजुनाथ बळ्ळारी, कार्यक्रम व्यवस्थापक मनीषा पी. एस. आणि कर्मचारी उपस्थित होते. मंजुनाथ पै आणि अनुपमा के. यांनी कार्यक्रमाचे सूत्रसंचालन केले.