कागवाड तालुक्यातील उगार खुर्द येथील श्री मल्लिकार्जुन गुरुदेवाश्रमात ६ ते ८ एप्रिल २०२६ या कालावधीत वार्षिक उत्सवानिमित्त विशेष आध्यात्मिक कार्यक्रमांचे आयोजन करण्यात आले आहे, अशी माहिती बसवलिंग महास्वामीजी यांनी पत्रकार परिषदेत दिली.

सिद्धेश्वर स्वामीजींनी स्थापन केलेल्या या आश्रमात ६ एप्रिल रोजी ‘भारतीय संस्कृती’ या विषयावर आध्यात्मिक सत्र पार पडेल. उगार साखर कारखान्याचे व्यवस्थापकीय संचालक चंदनसाहेब शिरगावकर यांच्या हस्ते या सत्राचे उद्घाटन होणार असून विविध मठांचे स्वामीजी यावेळी प्रवचन देतील. या प्रसंगी माजी मंत्री श्रीमंत पाटील आणि माजी आमदार महेश कुमठळ्ळी उपस्थित राहणार असून विरुपक्ष रा. हुल्लोळ्ळी यांच्यातर्फे दासोह सेवा दिली जाईल.

दुसऱ्या दिवशी ७ एप्रिल रोजी ‘आहार आणि आरोग्य’ या विषयावर चर्चासत्र होईल. यामध्ये डॉ. प्रभाकर कोरे, डॉ. सोमशेखर पाटील आणि डॉ. कुनाल पाटील यांच्यासह विविध स्वामीजी व आध्यात्मिक विचारवंत मार्गदर्शन करणार आहेत. या दिवशीच्या दासोह सेवेची जबाबदारी नागनाथ सांगावे यांनी स्वीकारली आहे.

समारोपाच्या दिवशी ८ एप्रिल रोजी ‘मातृ-पितृ भक्ती’ या विषयावर मान्यवर स्वामीजींची प्रवचने होतील. आमदार भरमगौडा कागे यांच्या हस्ते उद्घाटन होणाऱ्या या सोहळ्यात प्रकाश हुक्केरी आणि लक्ष्मण सवदी यांच्या उपस्थितीत विद्यार्थी आपल्या पालकांचे पाद्यपूजन करतील. या दिवशी प्रकाश अ. राजमाने यांच्याकडून दासोह सेवा दिली जाणार असून भक्तांनी मोठ्या संख्येने उपस्थित राहावे, असे आवाहन बसवलिंग स्वामीजी यांनी केले आहे.