नंदगड येथील तलावात उभारण्यात आलेल्या क्रांतीवीर सांगोळी रायण्णा यांच्या भव्य पुतळा परिसरातील अंधाराबाबत ‘इन् न्यूज’ने प्रसिद्ध केलेल्या वृत्ताची प्रशासनाने गंभीर दखल घेतली असून, आता हा परिसर सौर दिव्यांच्या प्रकाशाने उजळून निघाला आहे.

ऐतिहासिक नंदगड गावातील तलावामध्ये क्रांतीवीर सांगोळी रायण्णा यांचा भव्य पुतळा उभारण्यात आला आहे. मात्र, मुख्यमंत्र्यांच्या हस्ते लोकार्पण झाल्यानंतर अवघ्या एका दिवसातच हा संपूर्ण परिसर अंधारात बुडाला होता. या गंभीर अनास्थेबाबत ‘इन् न्यूज’ने ‘अंधारात क्रांतीवीर’ या शीर्षकाखाली प्रशासकीय दुर्लक्ष अधोरेखित करणारी वृत्तमालिका प्रसिद्ध केली होती. स्मारकाच्या अवमानाबाबत जनमानसात तीव्र संताप व्यक्त होत असतानाच, आमच्या वाहिनीने संबंधित विभागाच्या कार्यपद्धतीवर प्रश्नचिन्ह उपस्थित केले होते.

या वृत्ताची दखल घेत संबंधित विभाग आणि प्राधिकरणाने तातडीने हालचाली करत तलाव परिसरात सौर ऊर्जा खांब बसवण्याचे काम पूर्ण केले आहे. यामुळे गेल्या काही दिवसांपासून अंधारात असलेली रायण्णांची मूर्ती आता रात्रीच्या वेळीही स्पष्ट आणि प्रखर प्रकाशात दिसत आहे. ‘इन् न्यूज’ने दाखवलेल्या या सामाजिक तत्परतेचे सर्व स्तरांतून कौतुक होत असून, प्रशासनाला कामाला लावणारा हा एक मोठा परिणाम मानला जात आहे.