बेळगाव जिल्ह्यामध्ये पेट्रोल, डिझेल आणि गॅस सिलिंडरचा कोणताही तुटवडा नसल्याचे जिल्हाधिकारी मोहम्मद रोशन यांनी स्पष्ट केले आहे. सोशल मीडियावर पसरणाऱ्या चुकीच्या माहितीकडे दुर्लक्ष करण्याचे आवाहन त्यांनी नागरिकांना केले आहे.

बेळगावमध्ये माध्यमांशी बोलताना जिल्हाधिकाऱ्यांनी परिस्थितीचा आढावा घेतला. सोशल मीडियावर पेट्रोलचा तुटवडा असल्याची अफवा पसरल्याने पेट्रोल पंपांवर नागरिकांच्या रांगा लागल्या होत्या, मात्र आता अशी कोणतीही समस्या नसल्याचे त्यांनी सांगितले. तसेच गॅस सिलिंडरचा पुरवठा देखील अत्यंत सुरळीतपणे सुरू असल्याचे मोहम्मद रोशन यांनी स्पष्ट केले.

इंधन पुरवठा करणाऱ्या कंपन्या आणि पंप मालकांशी यापूर्वीच सविस्तर चर्चा करण्यात आली असून, जिल्ह्यात कुठेही पेट्रोलची कमतरता भासणार नाही, असे आश्वासन मोहम्मद रोशन यांनी दिले आहे.

सुरुवातीला नागरिकांनी घाबरून जाऊन पेट्रोलचा साठा करण्यास सुरुवात केल्यामुळे काहीसा गोंधळ निर्माण झाला होता. मात्र, आता खबरदारीचा उपाय म्हणून पेट्रोल पंपांवर बाटल्या किंवा कॅनमध्ये पेट्रोल आणि डिझेलची विक्री करू नये, अशा कडक सूचना देण्यात आल्याची माहिती जिल्हाधिकारी मोहम्मद रोशन यांनी दिली आहे.