इस्रायल आणि इराणमधील युद्धजन्य परिस्थितीच्या पार्श्वभूमीवर, धारवाडमध्ये इंधन टंचाई भासणार असल्याच्या अफवेने गुरुवारी रात्री खळबळ उडाली. या चिंतेतून शहरातील पेट्रोल पंपांवर इंधन भरण्यासाठी वाहनधारकांनी एकच गर्दी केल्याचे पाहायला मिळाले.

धारवाडजवळील रायापूर येथील पेट्रोल पंपावर रात्री पावसाची रिपरिप सुरू असतानाही नागरिक रांगेत उभे होते. केवळ वाहनेच नाही, तर हातात बाटल्या आणि २० लिटरचे कॅन घेऊन नागरिक इंधन साठवण्यासाठी धडपडत असल्याचे चित्र सर्वत्र दिसत होते. व्यापारी वापराच्या गॅस सिलिंडरचा तुटवडा असल्याची चर्चा असल्याने, आता पेट्रोल-डिझेलचाही तुटवडा निर्माण होईल या भीतीने नागरिकांमध्ये चिंता पसरली आहे.

उद्या इंधन मिळेल की नाही, या संभ्रमातून नागरिक मोठ्या प्रमाणात साठा करण्याचा प्रयत्न करत आहेत. या अफवांवर नियंत्रण मिळवण्यासाठी जिल्हा प्रशासनाने तातडीने वस्तूस्थिती स्पष्ट करावी, अशी मागणी आता जोर धरत आहे. सध्या इंधन भरण्यासाठी पेट्रोल पंपांवर वाहनांच्या लांबच लांब रांगा कायम असल्याचे चित्र दिसून येत आहे.