बेळगावमधील ७४ वर्षीय ज्येष्ठ आंतरराष्ट्रीय धावपटू सुरेश लक्ष्मण देवमनी यांनी वय ही केवळ एक संख्या असल्याचे सिद्ध केले आहे. आंतरराष्ट्रीय धावपटू म्हणून बेळगाव जिल्ह्याची मान उंचावल्याबद्दल सरकारी विभागांच्या वतीने त्यांचा यथोचित गौरव करण्यात आला.

वर्ष २०२५-२६ मधील क्रीडा स्पर्धा, रॅलींचे आयोजन आणि युवा व क्रीडा उपक्रमांना प्रोत्साहन देण्याच्या योजनेंतर्गत बेळगावमधील ज्येष्ठ आंतरराष्ट्रीय धावपटू सुरेश लक्ष्मण देवमनी यांचा सत्कार करण्यात आला. आंतरराष्ट्रीय स्तरावरील धावण्याच्या स्पर्धांमध्ये चमकदार कामगिरी केल्याबद्दल ७४ वर्षीय देवमनी यांना महिला व बालविकास विभाग तसेच युवा सक्षमीकरण आणि क्रीडा विभागाच्या वतीने १० हजार रुपयांचा प्रोत्साहनपर निधी देऊन सन्मानित करण्यात आले. या सन्मानामुळे जिल्ह्यातील क्रीडाप्रेमींमध्ये आनंदाचे वातावरण असून, उतारवयातही क्रीडा ज्योत तेवत ठेवणारे सुरेश देवमनी आजच्या तरुण पिढीसाठी आदर्श ठरले आहेत, अशी प्रतिक्रिया जिल्हा क्रीडा प्रेमींनी व्यक्त केली.